Хуьрерин мулкар абадунин крарив Мегьарамдхуьруьн районда гьеле фадлай эгечIнавай. Исятдани хуьрерин къенепатан рекьер хъсанарунин кIвалахар давам жезва. Идакай «Лезги газетдиз» райадминистрациядин пресс-къуллугъди хабар гана.
ИкI, Хъартас-Къазмайрин хуьруьн Н.Самурскийдин куьче тамамвилелди ремонтна, адан яргъивилел 550 метр ала. Рекьиз чиргъ вегьена ва герек чкайрик турбаярни кутуна. Чиргъ вегьейдалай кьулухъ рекьин винел патан къат катокдалди дуьз хъийизва. Санлай къачурла, 35 метрдин мензилдик турбаяр кутуна. Рекьер къайдадик кутунин кIвалахар кьилиз акъудун патал лазим тир техникани вахтунда агакьарзава. Хъартас-Къазмайрин хуьруьн И.Шамилан куьчени мукьвара ремонтдайвал я. И кIвалахар хуьруьн администрациядин кьил Омар Нагъиеван регьбервилик кваз тамамарзава.
Къейд ийин, абадвилихъ тухунин кIвалахар Азадогълийрин хуьрени анин администрациядин кьил Меристан Яралиевадин гуьзчивилик кваз кьиле тухузва. И хуьре хъсан гьалдиз хканвай куьчейрин мензил 800 метрдикай ибарат я. Хуьрерин къенепатан рекьер хъсанарунин кIвалахар муниципальный программадал асаслу яз кьилиз акъудзава.
«Лезги газет»
