13-майдиз Докъузпара райондин кьил Абдурагьим Алискерован регьебервилик кваз райадминистрацияда нубатдин совещание кьиле фена. Идакай «Лезги газетдиз» «Dokuz-para.ru» официальный сайтди хабар гана.

Райондин жавабдар ксарин иштираквал аваз кьиле фейи совещанидал са жерге месэлайриз килигна. А.Алискерова малумарайвал, «Теки-Къалажух» къанал туькIуьрунин кIвалахар акьалтIарун патал алай йисуз республикадин бюджетдай пулдин такьатар чара авунва. Къаналдин кIвалахдив мукьвара эгечIдайвал я.

Райондин кьили УКХ-дин руководителвиле Незирмет Бухсаев тайинарайдакайни, 7-майдиз районда чкадин радио ачухайдакайни малумарна.

Гуьгъуьнлай райондин кьилин заместитель Агьмед Агьмедова 2019-йисан 2-кварталда налогар кIватIунин, чилерни объектар актуализация авунин месэлаяр тамамарзавай гьалдикай галай-галайвал ихтилатна.

Райондин кьилин заместитель Салигь Гьажимурадова Гъалибвилин сувариз талукь яз райондин сергьятра кьиле фейи са жерге мярекатрин нетижаяр кьуна.

Алай йисуз Докъузпара район арадал атайдалай инихъ 85 йис тамам жезва. И кардихъ галаз алакъалу яз, райондин кьил А.Алискерова талукь тир идарайриз юбилейдин суварин гьазурвилер акунин тешкиллувилин комитет арадал гъунин тапшуругъ гана. Тешкиллувилин комитетдин председателвиле Салигь Гьажимурадов тайинарда.

«Лезги газет»