* * *
Хазина я дидедин чIал,
Шадарзавай гьар лезги кIвал,
Чир хьун патал ватандин гьал,
Шад хабарар ийиз гуьзет,
Кхьихь, кIела “Лезги газет”.
Халкьдин адет, кIвал хуьдайвал,
Майва авай сал хуьдайвал,
Гьар лезгиди чIал хуьдайвал,
Сад Аллагьди гурай нуьсрет,
Кхьихь, кIела “Лезги газет”.
Пара чIалар хьайитIа чир,
Ашкар жеда дуьньядин сир,
Ашукьд хурал рахаз чуьнгуьр,
Мез дилавар, чIал я девлет,
Кхьихь, кIела “Лезги газет”.
Нехирбан яз, мал чир тахьун,
Адет-къайда, гьал чир тахьун,
Лезгияр яз, чIал чир тахьун,
Тавурай квез халкьди туьгьмет,
Кхьихь, кIела “Лезги газет”.
Миллетчи я гьар са инсан,
Багьа я чаз Диде-Ватан,
ЧIал галачиз жеч авадан,
Дидед чIалаз ая гьуьрмет,
Кхьихь, кIела “Лезги газет”.
Багьа мугьман ийиз гуьзет,
Къуй атурай кIвализ лезет.
Эглеш жемир кхьиз газет,
Гьайиф къвемир гудай къимет,
Кхьихь, кIела, “Лезги газет”.
РикI тIармир, бала
Диде — бубадин гьич хамир хатур,
Чан лугьуз мецелди, генг лувар кутур.
Дяведин, зегьметдин азаб, каш акур,
Яшлудан гуьгьуьл яхъ, рикI тIармир, бала.
Вилерал гьайифдин нагъв-кьагьар алаз,
Чин кIевна ястухдал шехьда, тIал аваз,
Чир тийиз чпин дерт, вав хъуьрез-рахаз,
Яшлудан гуьгьуьл яхъ, рикI тIармир, бала.
Аялдин ухшардиз элкъведа хесет,
Авурла шандакьар, ийимир туьгьмет,
Уьмуьрдин йисаркай вахчурай кфет,
Яшлудан гуьгьуьл яхъ, рикI тIармир, бала.
Дидедив, бубадив бурж вахкуз жедач,
Баладикай рикI динждан кьил агъуз жедач,
Багърияр хвейи кас вич ялгъуз жедач,
Яшлудан гуьгьуьл яхъ, рикI тIармир, бала.
Зи гафар кьуртIа на къедамаз япа,
Яшлудан ериндал вун жеда пака.
КIан ятIа вахъ хьана камаллу арха,
Яшлудан гуьгьуьл яхъ, рикI тIармир, бала.
Къарибаз акуна гьар жуьре девир,
Чан алай гьар садахъ авайд я эхир.
Хъсанвал улам я, женнетдин жигъир,
Яшлудан гуьгьуьл яхъ, рикI тIармир, бала.
Аллагь рази хьуй
Яб це, дустар, Аллагь рази хьун патал,
ГъалатI квачиз кьве кIвачи чил кьун патал,
Регьимлу яз яшлувал акун патал,
Гьар са касдин им хивевай буржи хьуй,
Инсан рази жедач, Аллагь рази хьуй.
Куьмек гумир кIеве гьатай шейтIандиз,
Ада русвагь ийида вун, душман хьиз,
Гьахълувал гваз экъечI элдин майдандиз,
Вун сабур гваз, яшар хьана кьуьзуь хьуй,
Инсан рази жедач, Аллагь рази хьуй.
Гьахъ гафуни тIарда, мелгьем жагъидач,
Гьахълу инсан фитнечидив кикIидач.
Дуьзвал винел акьалтда, ам рекьидач,
Халкьдин кьиле гьахъ гвай регьбер къази хьуй,
Инсан рази жедач, Аллагь рази хьуй.
Дуьнья гайитIан, инсанди ваъ лугьудач,
Гьуьлер, белки, ацIуда, нефс ацIудач.
Вири туна фида, затIни тухудач,
Уьмуьр къвез-физ аквазвай гуьзгуь хьуй,
Инсан рази жедач, Аллагь рази хьуй.
Уьмуьр гьарай-эвер авай базар я,
Мергьяматлу хьухь, бубайрин тарсар я.
Хъел, квак хьтин, къеняй недай азар я,
Гунагькарриз шуьрбет — мелгьем ажи хьуй,
Инсан рази жедач, Аллагь рази хьуй.
Самур дере, Гарагърин хуьр ватан я,
Зи хайи чил женнет — багъдин бустан я.
Зун гьахъ-нагьахъ бубад чирай инсан я,
Гьар са кьегьал ватанперес лезги хьуй,
Инсан рази жедач, Аллагь рази хьуй.
Насигьат
Япариз ван тахьай, вилериз такур,
Футфачи иблисдин чIалахъ жез тахьуй.
Жуван лаш гъилевай аквада какур,
Чарадан чIалахъ жез, ахпа шез тахьуй.
ЧIехидал меслят ая гьар кIвалах,
Пад жувахъ чIугвадай вахъ терез тахьуй.
Таб авун герек туш, хъжедач чIалахъ,
Ви авам гафарал халкь хъуьрез тахьуй.
Камаллу инсандиз акьулар гумир,
Алазни-алачиз рахар мез тахьуй,
НетIерин себебдай перемар кумир,
Сабурлу инсан хьухь, хъилер къвез тахьуй.
Гьарамдин шейинихъ берекат жедач,
Чарадан чуьнуьхай суьрсет нез тахьуй,
Къачагъдихъ, угъридихъ фаракъат жедач,
Гьалалди ширин я, гьич элкъвез тахьуй.
И дуьнья эбеди садазни жедач,
Пака югъ темягь яз, вун гелкъвез тахьуй.
Аллагьди тагайтIа, садани недач,
Нефсинихъ калтугна, чан мерез тахьуй.
За гайи насигьат хазина я квез,
Гъилеваз, бахтунихъ куьн къекъвез тахьуй.
Ашукьдин хуруда дилавар я мез,
Акьуллу гафарал куьн хъуьрез тахьуй.
«Лезги газетдин» 2019-йисан 19-нумрадай.
______________________________________________________________
Дустариз
(Етим Эминан жуьре)
Зун физва и дуьньядин винелай,
Са йисалай алатда куь рикIелай,
Хъсанвални писвал туна мецелай,
Тухузвайди са чан я лагь дустариз.
Дуьньяд винел ажалсуз кас хайид туш,
Гьамишалугъвал садазни гайид туш,
Дуьнья, ви нефс ацIана, тух хьайид туш,
Нефс пичIиди инсан я лагь дустариз.
Кьежей мез я, кIани патахъ рахадай,
Гъил къачу, дуст, рикI тIарнатIа хатадай.
Вил галама садра дустар ахквадай,
Сабурсуз мез душман я лагь дустариз.
Уьмуьрда заз зун кIаниди хьайид туш,
Муьгьуьббатдин пияла за хъвайид туш,
Хизан хьана, чинал леке гъайид туш,
Зи рикI хура яман я лагь дустариз.
АкI жеда заз, фейи уьмуьр ахвар тир,
Кьилел атай дуьшуьшарни махар тир,
РикI къене шез, вилел хьайбур накъвар тир,
Тухвай уьмуьр гьижран я лагь дустариз.
Вил гала зи хайи дагъдихъ, булахрихъ,
Къацу векьин цуьквед кьунвай яйлахрихъ,
Чубанд гъилин нисини нек къаймахрихъ,
Гьа югъ ахкун дарман я лагь дустариз.
Сад Аллагьдив зун ялвариз рахана,
Къе азраил зи варарал атана,
Жегьил уьмуьр гарув гвай хьиз тухвана,
Амукьдайди са ван я лагь дустариз.
Етимдин суза
Хайи макан, ви къужахда
Дидедин лайлай кIанда заз.
Сурал шехьиз, ви ужахда,
Эвер гайла, гьай кIанда заз.
Заз чидай туш тавазвилер,
Нин лампадин экв хьана зун.
Саврухди зи хана хилер,
Къавах тар хьиз тек хьана зун.
КукупI хьтин, муг авачир,
Диде такур авара я.
Куьз я уьмуьр, кфет квачир,
Хажалатар зи пара я.
Етим хьунухь гунагь кар туш,
Етимайди гунагькар я.
Жувахъ даях-панагь хьай туш,
КIулавайди залан пар я.
Заз кас амач, квез чизава,
Хабар кьадай гуьгьуьлдикай.
Вил галамаз, къвез-физавай,
Вучда ихьтин уьмуьрдикай…
Набататрин сирер
Дагълара — аранда жеда бул кьачIар,
ЧIурубур — къенибур — дармандин хъчар.
Руфуниз, ратариз, хуквадиз курквачIар,
Ивидиз, кпулриз вергер хъсан я.
Эферар, стIуяр, тIенгирар, лурсар,
Тегьмезхан, инжияр, цирияр, сурар,
Къуьрен пеш, цурун пеш, некIедин чарар.
Иштягьдиз, виш тIалдиз серкер хъсан я.
Беденда гьатайла къиздирмадин тIал,
Сивикай эйбежер къведайла пис ял,
Пурнийрин ширедкай хъвайила стIал,
Дармандиз цуьруьхуьм мертер хъсан я.
Хъчарикай афарар, хъикьифар, чIиргъин
Ийидай бадейри дарман яз якъин.
Буьвелар сагъариз, авадриз ирин,
Паркьулдин, дамардин пешер хъсан я.
Са бязи алимриз течидай тамам,
Чир жеда гьар са хъач гьайванриз авам.
Къеврагь яз, ар ягъиз хьун патал хуррам,
Ламариз къалгъанар, серкIвер хъсан я.
ТIебиат гуьзел я, хъчарни мублагь,
Гьар са хъач чир тахьун тушни чаз гунагь.
Азарлу хьайила, лугьуз “я Аллагь!”
Дири яз, багъишдай цуьквер хъсан я…
«Лезги газетдин» 2019-йисан 47-нумрадай.
________________________________________________________________________
Керекул паб
Гуьрчег тир вун, тIавус къуш хьиз,
ХупI кIан хьанай вун зи рикIиз,
Къекъведайла атир чикIиз,
Женнетдин цуьк яни яраб,
Вун зи кьисмет, керекул паб?
Са йис жердал чирнач къилих,
Аял хьайла хьана къаних,
Зи камалдик кутаз синих,
Гьар келима хьана ви таб,
Вун зи кьисмет, керекул паб.
КIелна иблисвилин курсар,
ШейтIандикай кьуна дустар,
Чин хьайила, жагъид астIар,
Угъри лугьуз, гана лакIаб,
Вун зи кьисмет, керекул паб.
Квахьна абур, гьая вичин,
Хесет кьуна ялтах кацин,
Ашна хьана кицIин хцин,
ЧIуру рекье хьана кабаб,
Вун зи кьисмет, керекул паб.
Кьуна вуна фекьид туьтуьх,
Итим жуваз ийиз муьтIуьгъ,
Хкадарна кIвалин ишигь,
Кхьиз гана чIуру запаб,
Вун зи кьисмет, керекул паб.
Чан аламаз диде-буба,
Етимарна куьрпе бала,
Вакай адаз хьанач ала,
Дарман хьана ички — шараб,
Вун зи кьисмет, керекул паб.
Квез Къариба лагьай гафар,
Бахт куь гъиле ава, вахар.
КIвал чукIурмир, залум папар,
Аллагь патал къачу суваб,
Вун зи кьисмет, керекул паб…
«Лезги газетдин» 2020-йисан 24-нумрадай.
__________________________________________________________________
Дарамат я и дуьнья
Килигналди вил ацIудач, мензер я,
Гьейран жедай аламат я и дуьнья.
Рагъдан хьайла, ам агалдай пенжер я,
КIвал — сур авай дарамат я и дуьнья.
Инсаният къвезва мублагь чилерал,
Амма вири инсанар яз хъфизвач.
Зегьмет чIугваз, къабар жезва гъилерал,
Бязибурун темпел гъилер ифизвач.
Инсан яшдин лепейраллай гими я,
А кьил такваз, сирнавзавай уьмуьрда.
Дуланажагъ, къуллугъ гьализ сейли я,
ТIебиатди инсан твазва суьгьуьрда.
Дуьнья кьурвал гьалда, савда — кутурвал.
Яш хьайила аквада чаз гъалатIар.
Герек къведач сагъ хизанда кагьулвал,
Муьрхъуь кьуна виже къведач алатар.
КIвал эцигна, багъ кутазва несилдиз,
Диде-бубад тIварар гузва хтулриз.
Рузи патал гьар сан суьрсет гьасилиз,
Тербия гуз, рехъ къалурда штулриз.
Им уьмуьрдин къвез-хъфизвай улам я,
Гьа и рекьиз кIур гузава бендейри.
Гунагь михьдай гур жегьеннемдин гьамам я,
Сад Аллагьдиз ялварзавай дидейри…
Эрекьдиз
Эрекьдикай рахамир пис,
Шуьшед къене ава иблис.
Хъвайи инсан жедач мад кис,
Лал мецел чIал гъидай затI я.
Вун шуьшеда цайи гавур,
Уьлкведиз вун хьана машгьур,
На суфрадин чIурда абур,
Межлисдал къал гъидай затI я.
Акахьайла эрекь — чехир,
Пакамахъ жув хъжедач чир,
Гъилер зурзаз, суфат пехир,
Къиздирмад гьал гъидай затI я.
Жувакай къвез ни эйбежер,
Мурдардивай эхиз тежер,
АгалайтIан сивин пенжер,
Къеняй пис ял къведай затI я.
Къарибаз ви акуна дад,
Дарман патал хъвадач вун мад,
Дустар галаз хьайила шад,
РикIелай кIвал фидай затI я.
«Лезги газетдин» 2021-йисан 18-нумрадай.
