Агъахан Маметов

Савкьат я ваз

Кьуна табагъ, къелем гъиле,

Чун чирхчир хьанвач гьеле

Салам я ваз зи патай къе,

Зи шадвилин савкьат я ваз.

 

АкуначтIан вилериз зи,

Ви гафарал зун я рази.

Чар кхьизва за ваз гъвечIи,

Сагъламвилин савкьат я ваз.

 

Ацукьна зун хевлет кIвале,

Эциг тежез шиирд бине.

Тунай зун и карди кIеве,

Азабдин чар савкьат я ваз.

 

Ви гъвечIи тир ктаб кIелиз,

Шад жезва зи чими рикIиз.

Эй Эмин, ви кьегьалвилиз

Гаф авач, чар савкьат я ваз.

 

Зав вице на ви азад гъил,

Зун гьич тамир вуна гъафил.

Ялцугъ Эмин — чIехи шаир,

Жаваб вахце, савкьат я ваз.

 

ИкI  жедани?

Гафар зурба, крар агъуз,

Акъвазмир вун текдиз ялгъуз.

Пашман жед вун эхир са къуз,

Фартар регъв хьиз, икI жедани?

 

Эцягъмира кIвачера къван,

Тестикь види фитне я кьван.

Ви чIарчIикай ийиз чукьван,

Гьамишанди икI жедани?

 

Тавакъу ваз, кисна акъваз,

Зазни чизва гила рахаз.

Хуруз кап яз, вун таб рахаз,

Икьван туькьуьл рикI жедани?

 

Гагь къугъвада вини гарал,

КIекни тадач лугьуз къурал.

Иеси кьей ичIи чувал,

Зун ви чIалахъ хъжедани?

 

Къе тахьана акунач ваз,

За къачуна кIан хьанач ваз.

КIеняй виниз акьван зурзаз,

Кьиляй-кьилиз икI жедани.

 

Вун хъжеч зи рикIиз чими,

Ихьтин гафар ийиз кими.

Чаз вуч лугьуз хьурай кIвали,

Ихьтин пехил рикI жедани?

«Лезги газетдин» 2019-йисан 19-нумрадай