“Дагъустандин дишегьли” журналдин алай йисан 2-нумра кIелдайбурув агакьнава. Журнал, инсанриз къуллугъ авун вичин асул буржи яз гьисабзавай, жуван халкьдикай, адан кьисметдикай фикирзавай сабурлу дишегьли Айшат Тазаевадикай кхьенвай очеркдилай башламишзава.
“АкьалтIай намуслу кар” тIвар алай макъаладай кIелзавайбуруз уьмуьрдин четин гьалара гьатайла, куьмек гудай кас тахьайла гьиниз фидатIа чир жеда. Ам хизандиз ва аялриз яшайишдин рекьяй куьмекар гузвай республикадин Центр я.
Мадни квез и журналдай алай вахтунда хайи чIалал акъатзавай ктабар авай гьал, чи мектебра кIвалахзавай тежрибалу бязи муаллимар чир жеда.
Журналдин 6-7 лагьай чинра “Куьредин хабарар” газетдин кьилин редактор, РД-дин лайихлу работник Асият Мусаевна Мирзалиевадикай ихтилат физва.
“Театр мидаим жеда!” — субутарзава вичин макъалада кIелзавайбуруз машгьур театровед, искусствоведенидин кандидат Гуьлуьзар Агьмедовна Султановади.
Журналдин и нумрада гзафбурун рикI алай гьикаятчи Агьмедхан Зирихгеранан “Залай алат” гьикаяни гьатнава.
“Ицарида авай женгинин минара” кIелайла квез ам гьикI ва мус арадал атанатIа чир жеда.
Журналда хийирлу меслятар, хуьрекар гьазурдай рецептарни гьатнава.
Чи мухбир
