И йикъара Хасавюрт райондин администрацияда кьиле фейи чкадин самоуправленидин йикъаз талукьарнавай мярекатдин сергьятра аваз муниципалитетдин руководстводи акьалтзавай несилриз чирвилер, тербия гунин, ахлакьдин рекьел желб авунин карда бегьерлудаказ кIвалахзавай са жерге юлдашрив наградаяр вахкана.
Шад жедай кар ам я хьи, абурун арада “Лезги газетдин” хсуси мухбир, “Къурушрин сес” газетдин кьилин редактордин заместитель, Дагъустандин лайихлу муаллим Гьажибала СултIанович Къазиевни ава. Адаз райондин кьил Жамбулат Салавова акъуднавай къарардалди “Хасавюрт райондин гьуьрметлу агьали” лагьай тIвар ганва.
Хасавюрт райондин кьилин 1-заместитель Загьир Боташева Гьажибала Къазиевав хурудал алкIурдай знак ва шагьадатнама вахкудайла райондин вилик лезги чIаланни литературадин муаллимдин лайихлувилер екебур тирди къейдна, адан гьакъисагъ зегьметдикай ва тешкилатчивилин алакьунрикай лагьана.
Чнани чи къелемдин юлдашдиз и агалкьун рикIин сидкьидай мубаракзава ва Гьажибала муаллимдихъ гележегда мадни еке агалкьунар хьун алхишзава.
Чи мухбир
