Сулейман-Стальский райондин Герейханован 1-хуьре Къурбанов Байрамбеган хизан чIехи­бу­рукай сад я. Ирид кьил хизан авай лежбердин веледар хайи хуьре яшамиш жезва. И мукьвара хуьр арадал атана 90 йисарихъ агакьзава. Байрамбега вичин уьмуьрдин юлдаш Гуьлуьмагъадихъ галаз санал кьегьал пуд хвани 2 руш тербияламишна. Абуру чпин хизанарни галаз жуьреба-жуьре кIва­лах­рал зегь­­мет чIугвазва. Кьве хва механизаторар я, кьулан хва  Мирземамеда  къайдаяр хуьдай органра кIвалахна.

Мирземамед 1947-йисуз  дидедиз хьана. 1966-йисуз хъсан къиметар аваз 10-класс куьтягьай­  Мир­­­земамеда Ашхабад шегьердин университетдин юридический факультетдиз документар вугана. Конкурсдай акъат тавуна хтайла, са куьруь вахтунда­ совхозда рабочий виле кIвалахна. 1966-йисан эхирра армиядиз тухвана. Ада Уз.ССР-дин Чирчик шегьерда гьавадин оборонадин частара къуллугъна. Ругуд вацралай адаз млад­ший сержантдин чин гана,  командованиди аскердин кIвализ чухсагъулдин чарни рекье туна. Ам от­деленидин командирвиле тайинарна, старший сержантдин чинни гана.

Мирземамед 1963-йисуз — ВЛКСМ-дин, 1967-йисуз КПСС-дин жергейриз гьахьна. 1969-йисуз армиядай хтайла, чирвилер къачунин къаст авай жегьил мад Ашхабаддиз фе­на. Университетдик акат тавурла, ТССР-дин МВД-дин ор­ганриз гьахьай ам участковый инспекторвиле тайинарна. Отпуск къачуна, хуьруьз хтайла, Мирземамеда Исрефилан руш Салиятахъ галаз сир сад авуна. Адаз Салията 2 гадани 3 руш ба­гъишна.

1971-йисуз М.Къурбанов Ашхабаддин университетдин юридический факультетдик заочнидаказ экечIна ва юрист-правоведвилин пеше къачуна. 6 вацралай адаз младший лейтенантвилин чин га­на. КIвалахдин йи­сара чи ватандаш МВД-дин подполковникдин чиндал кьван хкаж хьана.

Туьркменистанда кIвалах­завай Мирземамедан рикI секин тушир. Яшар хьанвай (чебни инвалидар тир) буба Байрамбеган ва диде Гуьлуьмагъадин патав абуруз килигдай кас гвачир. Мирземамеда Туьркменистандин МВД-дивай вич Дагъустандин МВД-дин ихтиярдиз рахкурун тIалабна. 1991-йисуз  тIа­ла­бун кьилиз акъудна. Ам Махачкъаладин Ленинский райондин 4-отделдин начальниквиле тайинарна. Са йисалай ам Дербентдиз рахкурна. Ина ше­гьердин анализар ва гьахъ-гьисабар ийидай отделдин начальникдин куь­мекчивиле кIва­лахун давамарна. 1994-йисан августдилай пенсиядиз экъечIай М.Къурбанов хуьруьз хтана.

Чи ватандашдин гьакъисагъ зегьметдиз лайихлу къиметни тагана тунвач. Ада МВД-дин органра 25 йисуз зегьмет чIугуна. 1973-йисуз СССР-дин Верховный Советдин Президиумдин указдалди Туьркменистандин Вер­ховный Советди М.Къурбановаз “За отличную службу по охране общественного порядка” ва къанун — къайда хуьнин­ рекье 10, 15, 20 йисара гьакъисагъвилелди къуллугъ авунай медалар гана. 2002-йисан 5-июндиз ам Дагъустан Рес­публи­ка­дин МВД-дин министр, генерал-лейтенант А.Мегьамедтагьирован къул алаз “Россиядин МВД-дин 200 йис” медалдиз, 20-далай виниз гьар жуьредин грамотайриз, пишкешриз лайихлу хьана.­

Пенсиядиз экъечIна, хуьруьз хтайла, ада об­щественный кIва­ла­хар, гьа гьисабдай яз хуьруьн 1-нумрадин ДЮСШ-да диде-бубайрин комитетдин председателвилин везифа­яр­ кьилиз акъудна. Кьве сеферда ам хуьруьн­ советдин депутатвиле хкяна. 72 йис хьан­­ва­тIани, М.Къурбанов хуьруьн общественный уьмуьрдивай гилани къерех хьанвач. Жегьи­лар ватанпересвилин руьгьдаллаз тербияламишун, дуьз рехъ къалурун, насигьатар гун вичин кьилин буржийрикай яз гьисаб­зава.

Совхоз чкIайла, са гектарни 20 соток чил адавни кирида (аренда) вугана. Адакай 0,63 сотокда векь, амай чиле, гьар жуьредин къелемар акIурна, багъ кутунва, ана вичин­ хизанни галаз кIвалахзава. Са кIус­ни дамах гвачиз, халкьдихъ га­лаз са­нал хуьруьн вири мярекатра иштиракзава, жедай вири куьмекар гузва.­

Чи мурад Мирземамед Байрамбеговичахъ сагъвал, мадни яргъи уьмуьрар хьун я.

Вадим Жамалдинов