Россиядин МЧС-дин  Кьилин Управленидин УНД-дин ва ПР-дин Махачкъаладин Кировский районда авай гуьзчивалдай отделди гатфар ва гад алукьай бе­реда агьалийри кьурай векьерик ва зирзибилдик цIай кягъ тавуниз эвер гузва.  И кардал амал тавур гьар сеферда неинки чун элкъвена кьунвай тIебиат­диз, гьатта инсанрин сагъламвилизни еке зарар жезва, чIуру нетижайрал гъизва.

Сифтедай са еке хата авачир хьиз аквазвай цIай кягъуни еке мусибатрал, яша­йишдин кIвалер кунал ва инсанрин уьмуьр­диз хасаратвал гунални гъун мум­­кин я. ЦIу вичин хурук акатай вири — на­бататар, гьашаратар, гьайванрин ва къушарин шарагар тергзава. Идалайни гъейри, кьурай векьерик, иллаки рекьин къерехра авайбурук, цIай кягъуникди гьа­вадиз гзаф зегьерлу шейэр (феноформальдегидрилай эгечIна, залан металлрал къведалди) акатзава. Гуьгъуьн­лай чна зегьерлу  шейэр квай гьавадай нефес­ къачузва. Нетижада инсанрин иммунитет зайиф жезва, аллергиядин, нефес къачунин органрин азарар акатзава, яргъалди сагъа­риз тежедай уьзуьрри кьил хкажзава, онкологиядин азарриз рехъ ачух жезва.

ИкI тахьун патал агьалийриз агъадихъ галай къайдайрал амал авуниз эвер гузва: кьурай векь квай чкайриз, зирзибилдиз цIай ягъун, чуьллера цIаяр хъувун къадагъа я.

РикIел хуьх:

кьурай векьиз ва я адан амукьайриз цIай ягъунай РФ-дин административный къайдаяр чIурунрин гьа­къин­дай Кодексдин 20.4 статьядин 1-паюнай административный жавабдарвилиз чIугун къалурнава. ИкI, идараяр ва карха­наяр — 200 агъзур манатдив агакьна, къуллугърал алай ксар -15 агъзур ва амай агьалияр 3 агъзур манатдал­ къведалди жерме ийидай ихтияр ава. Ви­нидихъ къейднавай чIуру крар  цIаяр кьунал гьалтайла еке хаталувал авай чкайра кьилиз акъудайтIа, жермедин кьадар кьве сеферда артух жезва. Идалайни гъейри, цIув ва хаталувал авай маса чешмейрив мукъаятсуздаказ эгечIунал­ди, еке кьадарда чарадан эменни терг авунай ва адаз зиян гунай РФ-дин Уголовный­ Кодексда уголовный жавабдарвилиз чIу­гун, гьатта дустагъда тунни къалурнава.

Р.Аджиев, къенепатан къуллугъдин лейтенант