Алатай ислен юкъуз Махачкъалада, гуманитарно-многопрофильный колледждин актовый залда, Кьиблепатан Дагъустандин халкьарин милли майдан кьиле фена. Идалай вилик йикъара колледжда Дагъларин уьлкведин амай халкьарин майданарни вини дережада аваз тешкилнавай. И мярекатдин макьсад студентар жуьреба-жуьре халкьарин культурайрихъ галаз танишарун, абуруз руьгьдинни ахлакьдин ва сада-сад эхи авунин тербия гун, коллектив тупламишун тир. Кьиблепатан Дагъустандин халкьарин майдан винидихъ тIвар кьунвай чирвилер гудай идарада психолог яз кIвалахзавай, вичин ери-бине Сулейман-Стальский райондай тир Фарида Хаметовади тешкилнавай. Аферин чи ватандашдиз!
Сир туш, виликдай Кьиблепатан Дагъустан гамар храдай устIаррин, гьакIни хъенчIин къапарин макан яз машгьур хьайиди я. Мярекатдин тешкилатчийри, и кар фикирда кьуна, сегьне гамаралдини гебейралди безетмишнавай. Абурухъ галаз санал хъенчIин къапарини, цурун кварарини яргъал тир тарихдин чинар ачухзавай…
Мярекатдин багьа мугьманрин жергеда колледждин учредитель Тавлу Казакбиев, директор Жавад Гьажиагьмедов, директордин тербиядин рекьяй заместитель Лилия Казакбиева ва масабур авай.
Мярекат Кьиблепатан Дагъустанда яшамиш жезвай (лезги, табасаран, агъул, рутул, цIахур…) халкьарин тарихдикай,абурун ацукьун-къарагъуникай, машгъул хьайи кеспийрикай суьгьбет авунилай башламишна.
Лезгийрихъ хайи Ватан вири дуьньядиз машгьур авур ксар гзаф хьайиди рикIел хкана. Абурун жергеда Кеферпатан Кавказда муьридизмдин бине эцигай кас, Дагъустандинни Чечнядин имамрин муаллим, чIехи философ, лезгийрин, гьакIни Дагъустандин амай халкьарин азадвал патал ара датIана женг чIугур Ярагъ Мегьамеда, чIехи къагьриман Гьажи Давуда, лётчик-истребитель, Советрин Союздин Игитар — Валентин Эмировани Эсед Салигьова, чIехи шаир ва камалэгьли, лезги ва Дагъустандин эдебиятдин XIX асирдин машгьур классик, халис ватанперес, халкьдин рикI алай зарийрикай сад тир Етим Эмина, Дагъустандин советрин литературадин диб эцигай, лезгийрин тIвар-ван авай зурба шаир, алай йисуз вич дидедиз хьана 150 йис тамам жезвай СтIал Сулеймана ва масабуру кьетIен чка кьазвайди къейдна. Кьиблепатан Дагъустандин амай халкьарин векилрини тарихда гел тур чпин кьегьал рухвайрикайни рушарикай суьгьбетна, чпин чIаларалди шиирар кIелна, манияр лагьана. Колледждин студентри гьазурнавай лезги мехъер иллаки гурлуди хьана.
Мярекатдин тешкилатчияр кьилди Дербентдин Нарын-къеледин тарихдални акъвазна. ЮНЕСКО-дин къаюмвилик квай культурадин ирсиникай куьрелди суьгьбетна.
Чи машгьур манидар Арзумана лезги ва урус чIаларалди манияр тамамарна.
Мярекатдин тешкилатчийри Кьиблепатан Дагъустандин халкьарин милли хуьрекар гьазурунни рикIелай ракъурнавачир. Эхирдай кIватI хьанвайбуру суфрадал еке ленгерра аваз эцигнавай хинкIал, иситIа, дуьгуьдин аш, афарар, хьран фу, яр-емиш… дадмишна.
Чи мухбир
