И йикъара, Гъалибвилин суварин мярекатрин сергьятра аваз, Докъузпара райондин ЦIийи-Каракуьредин спорткомплексда са шумуд райондин чIехи командайрин арада волейболдай акъажунар кьиле фена.

Кьилди къачуртIа, Докъузпара, Ахцегь, Рутул ва Мегьарамдхуьруьн районрин волейболистри чпихъ авай алакьунар къалурна.

Къейд ийин, турнирдиз къаюмвал авурди Докъузпарадин райсобранидин депутатрин председатель Абас Абасов я. Турнир районда волейбол машгьурунин, спортсменрин устадвал хкажунин макьсадралди тухвана.

Къизгъин къугъунрин нетижада сад лагьай чка Докъузпара райондин ЦIийи-Каракуьредин волейболистрин командади кьуна. Кьвед лагьай чкадал Рутулрин ва пуд лагьай чкадал Ахцегьрин спортсменар хьана.

Тафаватлу хьайи командайриз «Докъузпара район» МР-дин кьилин заместитель Салигь Гьажимурадова шабагьар гана. Ада акъажунар тешкилайбуруз ва иштиракай спортсменриз чухсагъул малумарна. Эхирдай Салигь Гьажимурадова райондин кьил Абдурагьим Алискерован ва вичин патайни вирибуруз Гъалибвилин югъ мубаракна.

«Лезги газет»