Эминхуьруьз мус акъатайтIани, Эмин бубадин шартIунин кIвализ-музейдиз фин заз адет хьанвай кар я. Аниз килигна хтайла, кIула авай пар авудай кьван регьят жезва.

И сефердани ам авай гьал, адахъ гелкъвезвай тегьер акурла, зун гзаф рази яз хтана. Адахъ гелкъвезвай, ам арадал гъайи Гьайбатуллагьахъ элкъвена, заз лугьуз­ кIанзава:

Мукьуфдивди килигна зун иердиз,

Эминхуьре чи Эминан музейдиз.

Тариф ийир атанва ам тегьердиз,

Ваз баркалла къвезва, Гьайбатуллагь, къе.

 

Ам тарихдин чинрикай къе са чин я,

Къе ви гъил кьаз зунни, дуст кас, кIвачин я.

Лайих чка кьунва ада эркин я,

Агалкьунар хьанва, Гьайбатуллагь, къе.

 

Къалабулух кутазмай крар пара

Ама, гьелбет, им я чи кьведан ара.

Гьялиз жеда, гьабурни гьа и къара,

Теспача жемир, Гьайбатуллагь, къе.

 

Эмин буба хайи йикъан гьуьрметдай

Ваз баркалла къвезва чIугур зегьметдай.

Кас жедач ваз гьа и кардай туьгьметдай,

Кьил виневаз къекъуьгъ, Гьайбатуллагь, къе.

Макьави Шагьабудин