И йикъара Рутул райондин Хъуьлуьдрин хуьре шейх Мегьамедалидин невейрикай тир Жамалов Сеферан (ам вич рагьметдиз фенва) уьмуьрдин юлдаш Магьузара ва адан рушари чпин патай шейх Мегьамедали бубадин тIварунихъ, шейхер чеб яшамиш хьайи Текедал хуьруьн жемятдиз ва атанвай мугьманриз чIехи мавлид гана.
Мавлидда Кьиблепатан Дагъустандин вири районрин мискIинрин имамри, Дагъустандин муфтийдин Кьиблепатан Дагъустанда авай векил Магьди Гьажи Абилова иштиракна. Гь.Абилова диндиз талукь месэлайрикай гегьеншдиз суьгьбетна.
Шейх Мегьамедали бубадиз бахшнавай диндин межлис Рутул райондин имам Абдуселим Таирова кьиле тухвана. И мярекатдал гьуьрметлу Заур-Гьажи Салигьова нашидар кIелна. Ахпа атанвай мугьманри ва чкадин агьалийри Текедал чи кьегьал хва Сулейман Керимован куьмекдалди эцигай гуьрчег мискIинда нисинин капI авуна. Мавлиддик иштиракай вирибуруз ва диндин ихьтин зурба межлис тешкилунай Жалаловрин хизандиз шейх Мегьамедали бубадин невейрикай тир Акимов Надира сагърай лагьана.
С.-А. Абдурашидов
