АЗИМ БАБАЕВАН 110 ЙИС
Гьар гатуз хуьруьз хквез, чкадин агьалийрихъ галаз хуш рафтарвилера жедай, къаш-къамат авай, куьлуь камар къачуз къекъведай курхуьруьнви сад лагьай алим Азим Алиевич Бабаев, а вахтунин жегьилрин рикIел хъсандиз алама.
1907-йисуз Курхуьре лежбердин хизанда дидедиз хьайи ам ругуд йисалай бубадикай, 12 йиса аваз дидедикай магьрум хьана. Уьмуьрди адаз уькIуь-цуру къалурна. Етим хьайи гъвечIи Азим Бакудиз стхадин патав фена, ана нафтIадин буругърал кIвалахуниз, вичин кьил хуьниз мажбур хьана. Яшар бегьем тахьанмаз уьмуьрдин пис-хъсан акур ам чирвилерилай къуватлу яракь авачирдан гъавурда гьатна ва хайи хуьре мектебда кIелиз хьана. Гуьгъуьнлай Азима Бакуда педтехникум акьалтIарна, Кьасумхуьруьн юкьван школада кIвалахна.
Азим вичин пешекарвилелай рази тушир. Ада 1929-1932-йисара Кеферпатан Кавказдин пединститутдин физикадинни математикадин факультетда кIел хъувуна, гуьгъуьнлай аспирантурани акьалтIарна. Ада Дагъустандин пединститутдин физикадин кафедрадин ассистентвиле ва са йисалай доцент яз кIвалахна. Гъиле кьур кIвалах вахтунда ва ерилудаказ кьилиз акъуддай, вичин чирвилер хкажун патал датIана кIвалахдай жегьил итим 1937-йисуз ина факультетдин деканвиле тайинарна. Мад кьве йисалай ам ДПИ-дин директорвиле, 1951-йисуз физикадин кафедрадин заведующийвиле тайинарна. И хиле ада яргъалди зегьметни чIугуна. А.А.Бабаева Азербайжан Республикадин Илимрин Академиядин физикадин институтда физикадинни математикадин илимрин кандидатвилин тIвар къачуна.
1971-йисуз КПСС-дин Дагъустандин обкомдин тапшуругъдалди Азим Алиевич Бабаева Москвадин госуниверситетда атомный ва ядерный физикадай чирвилер хкаждай курсар кIел хъувуна. Меркезда уьлкведин машгьур алимривай чирвилер къачуна хтай пешекардал институтдин чирвилер раиждай секциядин председателвилин къуллугъ ихтибарна. Гьа са вахтунда ам институтдин парторганизациядин секретарь, адан бюродин член, агитколлективдин регьберни тир. Азим Бабаев ДАССР-дин Верховный Советдин гьуьрметдин грамотайрин, Зегьметдин Яру Пайдах ордендин “Знак Почёта” кьве ордендин, “Ватандин ЧIехи дяведин йисара гьакъисагъвилелди зегьмет чIугунай”, “Кавказ хуьнай” медалрин сагьиб я. А.Бабаев РД-дин илимрин лайихлу къуллугъчини тир.
Къе Азим Бабаеван рехъ адан невейри давамарзава, абурукай 8 кас алимар я. Арифа бубадин рехъ кьунва, ам физикадинни математикадин илимрин доктор я.
Райсудин Набиев
