Ахцегьрин Гуьне пата яшамиш жезвай Руслан Мегьамедов хуш къилихрин инсан я. Зани ада хуьруьн 3-нумрадин 8 йисан школада санал кIелна. А йисара, гьелбетда, захъ маса дустарни авай: Букар Гьамзаев (Аллагьдин рагьметдик кваз хьурай), Ибрагьим Ибрагьимов, Султали Гьасанов ва масабур. Амма Руслан, лугьудайвал, рикIин сир ахъайиз жедай кIеви дуст тир.
Классда надинж аяларни авай. Са кар рикIел хкиз кIанзава. Са юкъуз экуьнахъ чи классда кIелзавай са аялди тарсар башламишдалди вилик пичинин чинал чинеба са тIу-рунавай истивут вегьена. Нетижада классда пис гум гьатна. Истивутдин туьнт ниди вилер куз, кьвед лагьай тарсни кьиле тухуз хьаначир. Муаллимди тахсиркар чириз башламишайла, сада зи тIвар кьунай. И вахтунда Руслана зун школадиз зенг ягъайдалай кьулухъ атайди тестикьарнай. И карди заз екез таъсирнай. Гьа чIавалай заз ам намуслу инсан ва дуст тирди акуна. Пара вахтара чна тарсарни санал чирзавай, куьчейризни санал фидай. Гатфарихъ чна кьведани санал чи никIериз пер ядай. Чи алакъайрал пехилбурни авай. Классда Руслан Мегьамедов лап хъсан ученикрикай сад тир. Адан шикил школадин Гьуьрметдин доскадал алай. Школадин общественный уьмуьрда ва спортдин акъажунрани ам тафаватлу тир, гьуьрметдин грамотаярни авай.
1974-йисуз Ахцегьрин 3-нумрадин муьжуьд йисан школа куьтягьна, ам Махачкъаладин хуьруьн майишатдин техникумдик экечIна. 1977-йисуз диплом къачур жегьил гидромелиоратор армиядин жергейриз фена. 1979-йисуз хтана, Махачкъала шегьерда ДГОЭ-дин экспедицияда гидрологвиле кIвалахал акъвазна ва заочнидаказ Дагполитехнический институтдин гидромелиоративный факультетдик экечIна. 2009-2012-йисара ада, ООО “Энергострой” КТД-дин геологвиле кIвалахиз, Рутул райондин Амсар, Аракул хуьрера ва Гуниб районда гъвечIи ГЭС-рин эцигунра иштиракна. 2012-2017-йисара ООО “Эталон” карханада пешекар яз, Шур дереда мелиорациядин 50 млн.кубометрдин цин гьамбархана эцигна. КIвалахдин девлетлу тежриба авай адаз 2018-йисуз Ахцегьрин УСХ-дин цин къаналрин инженервиле кIвалахун теклифна. Алай вахтунда Руслан стха ина цин къаналар гегьеншарунал машгъул я. Халис пешекардин намуслу зегьмет гьуьрметдин грамотаяр ва пишкешар гуналди къейднава.
Алай вахтунда пенсияда аватIани, гъвечIи чIавалай зегьметдал рикI алай ада азад вахтунда вичин багъда гьар жуьредин кIвалахарзава. Къуй вахъ, хизандихъ чандин сагъвал ва хушбахтвал хьурай, гьуьрметлу Руслан стха.
Рагьидин Эминов
