Гатфар алукьна, гьаваяр са кьадар чими хьайивалди, Сулейман-Стальский райондин гзаф чкайра — КIварчагъ­рин, Аламишедин, Герейханован хуьрера ва масанрани гектарникрин, кьилди ксарин, лежбервилин гъвечIи майишатрин багъларин участокра, уьзуьмлухра кIвалахар галай-галайвал кьиле тухуз башламишнава. Участокар атIай хилерикай михьнава, яд гудай хвалар  ремонт авунни рикIелай алуднавач. Гьазур  хьанвай чкайриз гатфарин сифтегьан ятар гузва. И  кIвалахар Вини СтIалрин Дулун, Члар, Палас  участокра саки акьалтIарзава.

Гьавайрин къулайвиляй КIварчагъ дередин гектарникрини арендаторри и сеферда агротехникадин кIвалахар са тIимил фад хьиз башламишна. Герек авачир ва кьурай хилер атIун, цуьрцеркай, хилеркай михьун гьеле фад куьтягьнава. Зегьметдин и женгиник цIуд­ралди арендаторар экечIнава. Гзафбур эхиримжи йисара алава хьанвайбур я. Абурун жергеда кIварчагъви уьзуьмчи Ханов Ризамни ава. Ам жегьил итим я. Мектеб куьтягьна, ам кIва­лахар ийиз  патарал, гьакI Москвадизни фена. Вири­далайни жуван хизандин патав, хайи хуьре хъсан я лагьана, хтана, 2 гектар уьзуьмлухар 49 йисан муддатда арендадиз къачуна, аниз къуллугъзава. Къайдаяр тежрибалу уьзуьм­чийривай чирна, гила вичи масабур гъавурда тваз­ва. Адан  участок — жегьил ципицI­лух хъсан гьалда ава. КIва­лах­да адаз уьмуьрдин юлдаш Зейнабани куьмекзава. ЧIереяр симерал кутIунзава, ятар  гудай хваларни къайдадиз гъизва. Бязи вахтара патайни куьмекдиз эверзава. ЧIерей­рин араярни гьялнава.

“Шаз залай и участокдай 20 тонн ципицIар къачуз алакьна. ЦIи мадни гзаф къачуз алахъда”,  — лугьузва Ризама.

Авай гьалариз  килигайла, и кар кьилиз акъатдай хьиз аквазва. Къуй бул бегьер хьурай!

Райсудин Набиев