Дагъустандин шегьерар, шегьре ва ракьун рекьерин къерехар, паркар цIийи тарар ва кьуьд-гад къацу яз амукьдай кул-кусар гзаф цуналди генани аваданламишунин, гуьрчегарунин барадай республикадин Кьил В.Васильева эвер гуниз жаваб яз, Дербент ше-гьерда махсус субботникар тешкилун давам жезва.
И мукьвара шегьердин администрациядин кьил Хизри Абакарован иштираквални аваз кьиле фейи нубатдин серенжемдин юкъуз шегьердин Кеферпатан автостанциядин ва Дербентдиз гьахьдай гьалкъадин патарив вишелайни виниз цIийи тарар кутуна.
“Къацу гектарар” лишандик кваз кIвалахар башламишайдалай инихъ къадим шегьердин паркара ва куьчейрин къерехра икьван чIавалди кутунвай къелемрин кьадар, санлай къачурла, агъзурдалайни гзаф хьанва.
Шегьердин хейлин карханайрин, иллаки ири панелрикай кIвалер эцигдай ва коньякрин комбинатрин, газ квай чехирар акъуддай заводдин, образованидин управленидин, 21, 20, 17-мектебрин ва Дербентда авай детдомдин, пед ва медколледжрин ва са жерге маса идарайрин гьаятар акурбурун рикIер шадардай маканриз элкъвенва.
Шегьер къацу авунин кIвалахар и йикъарани давам жезва. Къацувилин ва михьивилин жигьетдай ина, гьамиша хьиз, цIийи конкурс тешкилдайвал я.
Нариман Къарибов
