22-апрелдиз Кьурагь райондин администрациядин заседанийрин залда райондин къурулушрин, тешкилатрин жавабдар къуллугъчийрин иштираквал авай совещание кьиле фена. Идакай «Лезги газетдиз» райондин администрация пресс-къуллугъди хабар гана.

Алатай гьафтедин кIвалахрин нетижаяр кьуниз ва вилик квай месэлаяр веревирдуниз, абур гьялдай рекьер жагъуруниз талукь нубатдин совещание хатасузвилин рекьяй райондин кьилин заместитель Альберт Исаева кьиле тухвана.

Информациядин технологийрин ва печатдин центрадин начальник Джаврудин Халикьова къуллугъчийри генерал Къагьриманован экуь къамат рикIел хкуниз талукь мярекатра иштиракзавайдакай ихтилатна. «Райондин газет вахт-вахтунда акъатзава, райондин мулкара жезвай вакъиайрикай, геж тавуна, официальный сайтдай агьалийриз хабар гузва», — къейдна Д.Халикьова.

Финансрин отделдин начальник Бахтияр Ибрагьимова райондин бюджет тамамарзавай гьалдикай, хъувуна кIани кIвалахрикай гьахъ-гьисаб гана.

Образованидин отделдин начальник Р.Катибова 9-Майдин суварин мярекатриз талукь яз гьазурвилер аквазвайдакай лагьана. Алатай гьафтеда кьиле тухвай кIвалахрин гьакъиндай муькуь идарайринни тешкилатрин кьиле авай къуллугъчийрини ихтилатарна.

«Лезги газет»