22-апрелдиз Ахцегь райондин кьил Осман Абдулкеримов ва райондин депутатрин Собранидин председатель Абдул-Керим Палчаев Къурукаларин мектебдиз мугьман хьана. Идакай «Лезги газетдиз» райадминистрациядин пресс-къуллугъди хабар гузва.

Къейдна кIанда хьи, РД-дин кьил В.Васильеван теклифдалди алатай йисалай республикада кардик акатай «100 мектеб» проектдин сергьятра аваз, Къурукаларин мектебда са кьадарда ремонтдин кIвалахар кьилиз акъудна. Райондин кьил О.Абдулкеримова ремонтдилай кьулухъ мектебда хьайи дегишвилериз галай-галайвал фикир гана. Адаз мектебдин директор Эдуард Магьмудова мектебдин гьаят абадвилихъ тухунин жигьетдай тухванвай кIвалахар ва цIийи хъувунвай чими, экуь классар къалурна.

Райондин кьили мектебда кIелзавай аялрихъ галазни ихтилатарна, чирвилерикай, агалкьунрикай хабарар кьуна.

ЦIаяр кьуникай ва терроризмдикай хуьнин гьаларни гьихьтин дережада аватIа, гьакI СанПиН-дин истемишунрал амалзавай гьални ахтармишна. Санлай къачурла, мектебда арадал гъанвай къулай шартIарилай райондин кьил рази яз амукьна.

«Лезги газет»