2019-йисалай Россиядин мулкарал яшамиш жезвай агьалияр рекъемрин (цифровой) телевиденидал элячIзавайдакай чна алатай йисан эхирра газетдай хабар ганай. 2018-йисан 47-нумрада чапнавай “ЦIийи йисалай элячIда” макъалада “Дагъустан Республикадин РТПЦ” филиалдин директордин заместитель Альфред Акимова и месэладикай гегьеншдиз суьгьбетнава.
Алай вахтунда Дагъустанда республикадин агьалийриз аналогдин, яни “куьгьне жуьредин” телевиденидилай цифровой ТВ-дал элячIиз куьмек гудай волонтеррин штаб арадал гъанва. Исятда штабдин кIвалахдал волонтерар желбзава ва гележегда абуруз цифровой ТВ-дал элячIунин сирер чирда. Мукьвара штабдин телефондин махсус нумрани кардик акатда. Республикадин агьалийривай, и нумрадиз зенгна, цифровой ТВ-дал элячIуниз талукь вири жуьредин суалар гуз жеда. Абуруз пешекарри жавабар гуда. И штабдик экечIдай гьевес авайбурувай 8-928-558-84-04 нумрадиз зенг ийиз жеда.
Къейд ийин хьи, алай йисан июндалди уьлкведин вири регионар цифровой телевиденидал элячIда.
«Лезги газет»
