15-апрелдиз Дагъустандин Кьил Владимир Васильев Кеферпатан Кавказдин МРСК-дин генеральный директор Виталий Ивановахъ галаз гуьруьшмиш хьана. Гуьруьш кьиле фидай чIавуз Дагъустан Республикадин электросетрин комплекс вилик тухунин Стратегия раижна.

Терефри республикадин энергетика пайгардик кутуниз талукь са жерге серенжемар веревирдна.

Къейд авун лазим я хьи, Кеферпатан Кавказдин МРСК-дин цIийи генеральный директор округдин регионрин руководителрикай сифтегьанди яз Дагъустандин Кьил Владимир Васильевахъ галаз гуьруьшмиш хьана.

“Дагъустан округдин виридалайни чIе­хи­ субъектрикай сад я. И региондин электросетрин комплекс вилик тухуниз чна кье­­тIен фикир гуда. Агьалияр электроэнергиядалди таъминарунин ери хъсанарун патал чна вичин  бинеяр алатай йисуз “Россети” компаниядин Вирироссиядин ученияр кьиле тухудай чIавуз кутур кIва­лах­ дава­марда.  Кеферпатан Кавказдин МРСК-да,  санлай къачурла, авай гьалар муркаббур я, вилик гьялна кIанзавай хейлин месэлаяр ква, буржарихъ галаз ала­къалу месэлаярни ава. Энергетикадиз ви­лик финин барадай дибдай цIийи жуьредин кIалуб герек я. И месэладин винел чна кIвалахда”, — къейдна Виталий Иванова.

Вичин нубатдай яз региондин руководителди Кеферпатан Кавказдин кьилин энергетик стратегиядин жигьетдай важиблу проектар уьмуьрдиз кечирмишунин карда властдин органри вири жуьрейрин куьмекар гудайдахъ инанмишарна. “Куьн цIийи къуллугъдал тайинаруни чи гуьруьшди хъсан нетижаяр гудайдахъ тайин тир инанмишвал кутазва: Куьне Крымда, Сибирда кIвалахна. Куь энергетикри алатай гатуз республикада кьиле фейи ученийра активнидаказ иштиракна.  И кардай мад сеферда сагърай лугьуз кIанзава: гьакъи­къатда гьа чIавуз сифте яз тайиндаказ Да-гъустан патал пулдин такьатар чара авуна. Нетижада 40 процентдив агакьна сетрин майишат ва тадаракар нормативри истемишзавай дережадиз гъана. И кар чна зу­лунни хъуьтIуьн девирда гьиссна. Чи вилик  четин месэлаяр хьун мумкин тирбурулай хейлин тIимил акъвазнава. Ам­ма гьа са хуьре, поселокда куьчейрикай сад нормативдихъ галаз кьадай гьалдиз гъанваз, муькуьди ихьтин гьалдиз гъун та­вунваз хьун — ихьтин гьаларни фикирда кьун лазим я. Ихьтин барабарсуз шартIара вирибур патал гьа са дережада тарифар хка­жайтIа, ида гъавурда акьун тавунин гьал арадал гъун мумкин я. Лазим­ тир шар­­­тIар яратмишнавай чIавуз, электроэнергия кье­­нят авуналди, норматив тамамариз же­да. Республикада са кьадар инсанар са ахьтин гьал-агьвал авачиз яша­миш жезва. Гьавиляй гьалар хъсан па­тахъ дегишар тавунмаз, тарифар хкажуни наразивилер арадал гъида”, — къейдна Владимир Васильева.

Региондин Кьили мадни алава хъувуна: “За фикирзавайвал, чавай бегьерлудаказ санал кIвалахиз жеда. Россиядин Президентди электроэнергия пуч хьунар тIимиларунин, ийизвай къуллугърин ери хкажунин везифаяр вилик эцигнава. Амма ида агьалияр патал, сифте нубатда­, тарифар артух хьуниз таъсир авун герек туш. Чна аннамишун лазим я хьи, менфят­ агьалийриз хкатун герек я. Чаз и кардал бинеламиш жез кIанзава. Вири и месэлаяр уьлкведин руководстводин гуьзчивилик ква”.

Гуьруьшдин кьилин нетижа гьихьтинди хьана лагьайтIа, терефар Дагъустан Республикадинни Кеферпатан Кавказдин МРСК-дин арада цIуд йисан вахтуналди икьрар кутIунунин меслятдал атана. И документдал 2019-йисан июндиз Санкт-Петербургда кьиле фидай международный экономический форумдин сергьятра аваз къулар чIугвада. Икьрарди Дагъустанда электроэнергетика вилик тухунихъ рекье тунвай важиблу проектар уьмуьрдиз кечирмишдай мумкинвал ачухда, республикадин электросетрин комплексда энергиядин пучвилер тIимил хьун таъминарда, гьакIни электроэнергиядин тарифар хкаж хьунин еришар агъузардай мумкинвал гуда.

“И икьрар кутIунунин нетижада чавай, финансрин рекьяй артухан пар илитI тавуна, агьалияр электроэнергиядалди ­таъминарунин ери хкаж хьун къазанмишиз жеда”, — алава хъувуна Виталий Ива­нова­.

Терефар,  Дагъустан Республикадин гьар са муьштеридин итижар вилив хуьналди, саналди тир серенжемар кьабулунин патахъай меслятдал атана.

Чи мухбир