Зи ихтилат Эминхуьруьн аскер-интернационалист Абдул Саидован тIварунихъ галай юкьван школада лезги чIаланни литературадин муаллим яз кIвалахзавай Жамила Гьажимирзоевна Жигеровадикай я.
Дагъви руш муаллимвилин пешедал ва лезги чIалал ашукьарайди адан дах я. Гьажимирзе Жигерова тамам 58 йисуз Хутаргърин ва Эминхуьруьн (Аламишедин) школайра акьалтзавай несилдиз лезги чIаланни литературадин тарсар гана.
Жамила 1976-йисан 8-майдиз Кьианрин хуьре дидедиз хьана. Са йисалай и хуьруьн жемят Аламишедиз куьч хьана. 1993-йисуз Жамилади юкьван школа, 1997-йисуз Москвадин гуманитарный педучилище ва 2008-йисуз Дагъустандин госуниверситетдин урус чIаланни лезги чIалан факультет (заочнидаказ) акьалтIарна.
Вичин зегьметдин рехъ Жамила Гьажимирзоевнади Эминхуьруьн юкьван школада сифтегьан классрин муаллимвиле кIвалахунилай башламишна. 2005-йисалай инихъ ада акьалтзавай несилдиз лезги чIаланни литературадин тарсар гузва.
— Жамила Гьажимирзоевна районда дидед чIалан лап хъсан муаллимрикай сад я, — лугьузва райондин лезги чIалан ва литературадин муаллимрин ассоциациядин председатель Гуьзел Алиевна Межидовади. — Республикадин “2019-йисан лезги чIалан лап хъсан муаллим” конкурсдин муниципальный паюна ада 1-чка кьунва.
Эхь, дидед чIалаз къуллугъзавай Жамила муаллимди ам аялризни кIанарзава. гузва. Ада чирвилер гузвай аялри районда кьиле тухузвай олимпиадайра, конкурсра ва маса мярекатра иштиракзава, лайихлу чкаяр кьазва. ИкI, алай кIелунин йисуз Ж. Жигеровади чирвилер гузвай 11-классдин ученица Сабина Султановади Етим Эминан шиирар устаддаказ кIелунин конкурсда 2-чка, 6-классдин ученица Милана Абдуллаевади Етим Эминан яратмишунрай шикилар чIугунин конкурсда 3-чка кьуна.
Жамила Жигеровади вичини районда ва республикада тухузвай конкурсра, мярекатра иштиракзава, школада чIалаз ва лезги шаиррин яратмишунриз талукьарнавай мярекатар тешкилзава, шиирар кхьизва.
— ЧIал хуьниз, чируниз ва вилик тухуниз талукь программа районда уьмуьрдиз кечирмишуни, гьар йисуз чIалаз талукьарнавай конференцияр, маса мярекатар тухуни, райондин регьбер, алим Нариман Шамсудиновича чIалан гьакъиндай ийизвай къайгъударвили чи виликни еке везифаяр эцигнава, чун абур кьилиз акъудун патал чалишмишни жезва, — лугьузва Жамила Гьажимирзоевнади.
КIвалахда ва лезги чIал хуьнин, вилик тухунин карда агалкьунрай мукьвара Жамила Жигеровадив Н.Абдулмуталибова “Умуд” фондунин гьуьрметдин грамотаяр ва пулдин пишкешар вахкана (шикилда).
— Жамила Гьажимирзоевна чи мектебдин дамах ва аялрин рикI алай муаллим я, — къейдзава школадин директор Рагьман Османовани.
Хазран Кьасумов
