Ихтилат, гьуьрметлу кIелзавайбур, чна туьквенрай къачузвай жуьреба-жуьре недай-хъвадай затIар (жемар, повидлояр, салан майвайрин ва емишрин компотар, ширеяр…) авай банкайрикай, минеральный ятарин бутылкайрикай — шуьшедин къапарикай физва.
Виринра, иллаки шегьердин чкайра, агьалийриз ичIи банкаяр (иллаки зур килодин ва 600 граммдин), къапар, минеральный ятарин бутылкаяр гьиниздатIа чизвач. Абур варцаралдини йисаралди кIвалера амукьзава…
Виридан хьиз, зи рикIелни лап хъсандиз алама: советрин девирда вири шегьерра, гьатта хуьрерани кваз шуьшедин ичIи къапар продуктрин вири туьквенри пулунихъ кьабул хъийизвай, махсус пунктарни кардик квай. Гила халкьдин мисалда лугьузвайвал, а валара къуьр амач. Шуьшедин ичIи къапар санани кьабулзамач. Чара тахьайла, бязибуру банкаяр, бутылкаяр зирзибилрин чкайрал гадарзава.
Виликдай гьар са карда кьенятлувал авай. Къенин “базардин экономикадин” девирда и гаф, эвер гун, гьатта инсанрин мецерални кьит хьанва. Гьайиф!
Суал къвезва: гьар са чкада шуьшедин ичIи къапар кьабулна, абур хам-мал гьялдай карханайриз, консервиярдай ва цин заводриз рекье хтун тешкилайтIа, хъсан тушни?
Гзаф агьалияр абур гьавайда, пулсуздаказ вахкузни гьазур я. Яраб зи и фикирдин тереф хуьдайбур жедатIа?..
Нариман Къарибов
