Балабегов Балабег Селимханович 1961-йисан 23-январдиз Мегьарамдхуьруьн райондин КьепIир-Къазмайрин хуьре дидедиз хьана. Школа хъсандиз акьалтIарай ам Харьковдин госпединститутдик экечIна. Физикадинни математикадин факультет агалкьунралди куьтягьна, армиядиз фена. 1993-йисалай инихъ КьепIиррин хуьруьн школада кIвалахзава.
Б.Балабегов вичин пешедал рикI алай муаллим я. Ада математикадин кьилдин кабинет туькIуьрнава. “Физикадай виридалайни хъсан тарс” тухунай ва “Бажарагълу инсан вири патарихъай бажарагълу я” конкурсда 1-чкаяр кьуна, муаллимрин арада райондин олимпиададин гъалибчи я.
Балабег Селимхановича тарсар гузвай аялрикай са шумуд кас грамотайриз, дипломриз лайихлу хьанва. П.Чебышеван тIварунихъ галай олимпиадада Сакрат Герейханов ва Мегьамеднаби Рагьимов гъалибчияр хьана, абуру пишкешар къачуна. Олимпиадайра ва маса конкурсра чкаяр кьур Лиана Гьажибеговадин ва Гьуьрижат Беговадин тIварарни кьаз жеда. Аялриз чирвилер гун патал муаллимди гзаф зегьмет чIугвазва. Зигьин авай аялар патал математикадай “Фрактал” кружокни тухузва.
Гележегдин пеше хкядайла, Балабег Селимхановича рикIел хкизвайвал, адаз са шумуд муаллимди таъсирна. Абурун тIварар гьамиша рикIел хуьн ада вичин буржи яз гьисабзава. Ихтилат лезги чIалан тарсар гайи муаллим Мегьемед Къафлановакай, обществоведенидин муаллим Шабас Шагьпазовакай физва. Амма математикадин тарсар гайи Рагьимов Хидирнабидиз Балабег муаллимди кьетIендиз чухсагъул лугьузва.
Къейд ийин, Балабег Селимханович шаирни я. Адан шиирри кIелзавайбур дерин хиялрик кутазва.
Умрият Рагьимова, ДГУ-дин студентка
