Заз и кас чиз хейлин йисар я. Ам Докъузпара райондин Макьарин хуьре дидедиз хьана. Усугъчайдал юкьван школа, Махачкъалада мединститут куьтягьна. Пермский областдин Верещагино станциядал ракьун рекьерин больницада кIвалахна. Анай хтайдалай кьулухъ Агъамегьамед Хаметович Хаметова Махачкъалада, шегьерэгьлийрин сагъламвал хуьниз герек тир шартIар яратмишиз, цIийи технологияр, тадаракар, дарманар кардик кутаз, хейлин къуллугъар бегьемарна. Дагъустандин здравоохраненидин министерствода (отделдин начальниквиле), шегьердин дезстанцияда (кьилин духтурвиле), шегьердин исполкомдин здравоохраненидин отделдин заведующийвиле, отделдикай управление хьайила, анин начальникдин заместителвиле къуллугъна. Гьа са вахтунда ада шегьердин 1-нумрадин больницадани, рикIинни жигеррин, неврологиядин, руфунинни ратарин азаррин вилик пад кьаз, кIвалахна. 1999-йисалай инихъ ам чи меркездин медработникрин профсоюздин комитетдин кьиле ава. Винидихъ тIвар кьунвай больницадани кIвалах давамарзава.
Тежрибалу пешекар ва тешкилатчи неинки духтурриз, сагъламвал хуьнин хилен къуллугъчийриз, гьакI вишералди адетдин ше-гьерэгьлийризни хъсандиз чида. ГьикI хьи, вирибуруз адан гъиликай, мецикай, чирвилерикай себеб хьана, гилани жезва.
ТIвар-ван авай юрист-адвокат, вичи яргъал йисара республикадин профсоюзрин хиле кIвалахай Гьатем Шамсудинович Ражабова заз Агъамегьамед Хаметовичан гьакъиндай ихьтин келимаяр лагьана: “Хаметович дерин чирвилерин, вичин хиве гьакъикъи къайгъударвал авайди гьиссзавай ксарикай сад я. Духтурдин, медработникдин ихтиярар хуьн патал ада бягьс чIугвада. КIвалахдин чкаяр хуьз, шартIар хъсанариз, кIвалеринни яшайишдин месэлаяр гьялиз ва икI мадни маса куьмекарни тешкилиз алакьун — им, заз чиз, профкомдин, гьакI духтурдинни чIехи инсанвилин дережаяр раижзавай делилар я…”
За фикирзавайвал, юристдин къейдерихъ гьакъикъат гала. Агъамегьамед Хаметович зазни гзаф мярекатра (шегьерда, районда, масанра) акуна. Кар алай пай вичин хивез къачуз алахъда. Иллаки куьмек герек зайифдан тереф хуьда, ам кIевяй акъуддай рекьер къалурда. Ветеранрин гьакъиндай ийизвай къайгъударвал генани кьетIенди я.
Агъамегьамед Хаметовичан зегьметдин агалкьунар государстводи ва общественностди гьуьрметдин чIехи тIварар ва наградаяр гуналди къейднава. Ам РФ-дин ва РД-дин лайихлу духтур, РФ-дин ва РД-дин здравоохраненидин отличник, зегьметдин ветеран, РФ-дин здравоохраненидин работникрин профсоюздин ЦК-дин Президиумдин Гьуьрметдин грамотадин сагьиб я. Кьилинди, винидихъни къейднавайвал, чи меркездин вири медидарайра, шегьердин администрацияда, ведомствойра авай кьетIен авторитет я.
“Магомед Хаметович!” — ингье гьикI адан тIвар мецел гъизватIа.
“Сагъламвал” милли проект кьилиз акъудун патал медработникрин профсоюздин комитетдин регьберди вичин хивез къачузвай везифайрикай журналистдиз ганвай са интервьюда (“Дагъустандин уьмуьр” газет) ихьтин къейдер ава:
“…Поликлиникайра диагностикадин нетижаяр вилив хуьнин вахт куьруь авун, духтуррин ва медработникрин мажибрин юкьван дережа 2-2,5 сеферда хкажун, клиникайра виниз тир технологияр кардик кутун, чарарин кIвалах компьютерралди эвезун…”
Шегьерда демографиядин гьалар, аялар хун ва сагъламдиз хуьн саки 17-18 процентдин хкаж хьанвайди къейднава.
Полимиелит, гепатит хьтин хаталу азаррин кьадар тIимилариз, гриппдин хаталувал агъузариз, гила лагьайтIа, аялриз азарриз акси рапар ягъуникай кьил къакъудзавайбурун вилик пад кьаз алахъзава…
— Къейдна кIанда, — лугьузва ветеранди, — и вири месэлаяр, чи обществода кьилинбурукай яз, уьлкведин Президентдини, республикадин Кьилини чпин чарара кьетIендиз къалурнава. Чи фикирдани гьабур ава…
Чи агъсакъалди и мукьвара вичин 80 йисан юбилей къейдна. 52 йисуз ада вичин вири къуватар, инсанрин сагъламвал хуьнин рекьиз бахшна.
Агъсакъал гилани вичин пурара мягькемдиз ава. РикI хци, гъил михьи, ниятар къени касдиз чна лугьузва:
ИкI твах кьиле мадни яргъал йисара,
Инсанриз ви истеклу я бажарагъ.
Сагъламвилин мягькем кьуна важарар,
Лаш илига уьзуьррин терс гужарал!..
Мердали Жалилов
