И йикъара Ахцегьрин 1-нумрадин мектебдин муаллимрин дестедин собранидал РД-дин Кьил Владимир Васильева Халкьдин Собранидиз ракъурай Чар веревирдна. Идакай «Лезги газетдиз» Ахцегь райондин администрациядин пресс-къуллугъди хабар гана.
В.Васильеван Чарчиз талукь доклад мектебдин директор Сафинат Мамаевади кIелна. Ада къейд авурвал, республикадин регьбердин Чарче яшайишдиз талукь вири хилерин жигьетдай гьакъикъи тапшуругъар къалурнава. В.Васильева алатай йисан кIвалахдин нетижаяр ва вилик акъвазнавай, фикирдиз къачунвай месэлаяр къейднава. Гьукуматдин сиясат инсанрин важиблу месэлаяр гьялунихъ элкъуьрда: хатасузвал таъминарун, бейкарвал арадай акъудун, менфят артухарун, ерилу образование ва медицинадин куьмек гун…
Собранидал кьилди образованидикай, и хилез талукь проектрикайни веревирдна.
Республикадин Кьилин Чар Цуругърин юкьван умуми образованидин муаллимрин дестедини веревирдна. Абуру Чарче къалурнавай месэлаяр уьмуьрдиз кечирмиш жедайбур тирди къейдна. Республикадин Кьили хуьруьн халкьдиз, жегьил хизанриз ва пенсионерриз куьмек гунин месэлаяр важиблу яз гьисабнава.
Образованидин месэлаяр пешекар муаллимар галачиз гьялиз жедач. Белки, хуьрера муаллимар бес тахьунихъ галаз алакъалу месэла гьялиз жедай «Земский муаллим» программа кардик акатин…
Мектебдин директор Б.Къулиева вичин докладда В.Васильеван Чарче къалурнавай кар алай месэлаяр къейдна, абур кьилиз акъудунихъ авай метлеблувиликайни менфятлувиликай лагьана.
«Лезги газет»
