Сулейман-Стальский райондин жегьилрин парламентдин векилри куратор Мегьамед Алиев ва образованидин управленидин пешекар Маина Аликберова кьиле аваз, «Гьар са кIвализ регьим пая» серенжемдик кьил кутуна. Идакай «Лезги газетдиз» райондин администрациядин пресс-къуллугъди хабар гана.

4-апрелдиз серенжемдин иштиракчияр Кьасумхуьрелай тир Кьасумоврин хизандиз мугьман хьана. Хизанда авай азарлу дидедиз куьмекдин игьтияж ава. Абурун хизанда кьуд гъвечIи аялни ава. Жегьилрин парламентдин векилри хизандиз недай суьрсетар, алукIдай парталар тухвана.

И жуьреда фикир гунай Кьасумоврин хизанди серенжемдик кьил кутунвайбуруз чухсагъул малумарна.

Кьил кутунвай мергьяматлувилин серенжемдин макьсад куьмек лазим тир хизанрал жемиятдин фикир желбун я. Серенжемдин сергьятра аваз, дарвиле ва гзаф аялар авай хизанар патал жегьилри парталар, ктабар, къугъвадай затIар, недай суьрсетар гьазурзава.

Мегьамед Алиева къейд авурвал, серенжем давамаруналди, идалай кьулухъни гьар вацра са хизандал кьил чIугвадай фикир ава.

«Лезги газет»