Алатай гьафтеда Каспийскда, Росгвардиядин Дагъустан Республикада авай Управленидин ОМОН-дин базада, Россиядин Федерациядин милли гвардиядин кьушунрин Йикъаз (цIи 3 йис тамам хьанва)  талукьарнавай шад мярекатар  кьиле фена. Са шумуд сятда давам хьайи и мярекатра республикадин неинки къанун-къайда хуьдай вири органрин къуллугъчийри, Махачкъала, Каспийск, Хасавюрт шегьеррин администрацийрин, общественный ва жегьилрин организацийрин векилри, гьакI шегьерэгьлийри, гьа гьисабдай яз аялрини, гележегдин аскеррини иштиракна.  Абурун арада багьа мугьманарни авай. Мярекатар митингдилай башламишна. Ам кьилдин батальондин командир, генерал-майор Сергей Алейника ачухна.

-Тамам кьве асирдилай гзаф вахтунда Ватан хуьнин пак буржи кьилиз акъудзавайбурун арада милли гвардиядин кьушунри кьетIен чка кьазва. Абур, гьукуматдин къенепатан хатасузвал таъминарунал гьалтайла, чпик умуд кутаз жедай мягькем даях я.  Женгинин адетриз вафалу аскерри къенин юкъузни Дагъустанда, гьакI Кеферпатан Кавказдин федеральный округдин амай регионрани чпин пак буржи кьилиз акъудун давамарзава.  Сир туш, къуллугъдин рекьяй четинвилериз чахъ галаз санал багърийрини дурум гузва. Гьавиляй къенин юкъуз чна чи  хизанрин тIварцIихъни чими келимаяр лугьузва. Абурун куьмек ва  гъавурда акьунин ерияр чун гьар сад патал гзаф важиблу я. Къанун-къайда хуьнин ветеранризни кье­тIендаказ сагърай лугьуз кIанзава. Куь кье­гьалвални  жуьрэтлувал алай аямдин къуллугъчийриз чешне  я. Куь тежрибади, чирвилерини камаллувили акьалтзавай несилдиз руьгьдинни ахлакьдин ва ватанпересвилин тербия гунин карда куьмекзава. Чпин пак буржи кьилиз акъуддайла телеф хьайи кIва­лахдин рекьяй чи дустарни рикIел хкана кIанда. Абурун къаматар эбеди яз чи рикIера амукьда,- къейдна Сергей Алейника.

И гафарилай гуьгъуьниз кIватI хьанвайбур са декьикьада кисна, кIвачел акъвазна.

Микрофондихъ РД-да авай МВД-дин министрдин заместитель, полициядин начальник Дмитрий Гутыря атана.  Лишанлу югъ тебрик авуналди, ада Дагъустан Республикада авай Росгвардиядин Управленидин къуллугъчияр гьамиша виниз тир пешекарвилелди, дирибашвилелди, бажарагълувилелди тафаватлу хьайиди, къенин юкъузни и рекье чпин вези­фаяр пешекарвилин виниз тир дережада аваз кьилиз акъудун давамарзавайди къейдна.

Митинг кIвалахдин рекьяй везифаяр кьилиз акъуддайла телеф хьайи къуллугъчийриз ОМОН-дин базадин гьаятда хкажнавай памятник ачухуналди акьалтIна. Абурун экуь къаматар, са декьикьада кисна акъвазуналди, рикIел хкана.

Росгвардиядин Управленидин вири подразделенийрин къуллугъчияр “Гъалибвилин югъ” манидин сесерик кваз жергеда аваз фена.

Гуьгъуьнлай суварин мярекатар башламиш хьана. КIватI хьанвайбуруз яракь гваз, гьакI гъилералди кукIунин къайдаяр, яракьдай лишанар ягъунар, тахсиркарар кьуниз талукьарнавай вердишвилер (ва икI мад) къалурна. Росгвардиядин махсус подразде­ленийри женгина ишлемишнаай яракьдин выставкани ачухнавай. Ана Калашникован автоматар ва пулемётар, “Витязь” пулемётар, Дра­гунован снайпервилин винтовкаяр, гранатомётар ва тапанчияр авай.

Суварин мярекатрик еке къуватдалди машгьур дагъустанви Омар Ханапиевазни тек­лифнавай. Ада вичин алакьунар къалурна —  аял­рив ацIанвай микроавтобус, сараривди кьуна, са шумуд метрдиз ялна, ракьун­ зунжурар кьатIна, ракьун тIвалар алчударна ва икI мад.

КIватI хьанвайбуруз майдандал ачухнавай кухняда аскеррин тIуьнрикай дадмишдай мумкинвални авай.

ОМОН-дин базадин залда кьиле фейи шадвилин собранидал кIвалахдин рекьяй тафаватлу хьайи къуллугъчийрив гьуьрметдин грамотаяр ва къиметлу пишкешар вахкана.

Эхирдай концерт гана. Ана неинки Да­гъус­тандин эстрададин гъетери, гьакIни оперативный кьилдин бригададин военный оркестрдин артистрини чпин устадвал къалурна.

Рагнеда Рамалданова