2018-йисан делилралди, Дагъустан Республика цIийи багълар кутунин карда  кIвенкIвечи чкаяр кьунвай вад региондин сиягьда гьатнава, хабар гузва РД-дин хуьруьн майишатдин ва недай суьрсетдин министерстводи.

Республикадин хуьруьн майишатдин зегьметчийри алатай йисуз, планда къалурнавай кьадар 1210 гектар яз, 1420 гек­тардин  майданра цIийи багълар кутунва. 2019-йисан пландик мад 1298 гектарда къелемар цун ква. Дагъустандихъ га­лаз санал и карда хъсан нетижаяр Крас­нодарский крайдихъ, Кабардино-Балкариядихъ, Белгородский областдихъ ва Чечнядихъ хьанва.

Къейд ийин, 2018-йисуз Россиядин хуь­руьн майишатдин министерстводи, АПК виликди тухуниз талукь госпрограммадин сергьятра аваз, гзаф йисарин наба­татар цун ва абурухъ гелкъуьн па­тал  тах­минан 5,3 миллиард манат чара­ аву­най­. Им адалай вилик квай 2017-йисан кьадардилай  1,6 сеферда гзаф тир делил я.

Федеральный идаради гуьзлемишзавайвал, и серенжемрин нетижада  емишрин тарарин майданар 2024-йис алукь­далди 68 агъзур гектардин артух хьун лазим я. Нетижа яз, и девирда гьасил­завай емишрин ва куьлуь емиш­рин (ягоды) санлай къачур кьадар 1,7 милли­он тонндив агакьун, яни алатай йисандав гекъигайла, 41 % артух хьун лазим я.

Россияда АПК виликди тухуниз талукь госпрограммадин сергьятра аваз,  2013-йисалай инихъ 78,4 агъзур гектарда   цIийи багълар кутунва.  2018-йисуз  хуьруьн майишатдин карханайра ва КФХ-ра кIватIнавай емишрин ва куьлуь яр-емишрин бегьер рекорддин 1,2 миллион тонн­див агакьнай. Им адалай вилик квай йисан­ кьадардилай 41,4% виниз тир.

Чи мухбир