11-13-апрелдиз республикадин меркезда, Милли библиотекадин дараматда эцигунрин хилез талукьарнавай регионрин уртах “Эцигунар. Архитектура. Инновацияр — 2019” выставка кьиле фида.
Республикадин мулкунал кьвед лагьай сеферда тешкилзавай и выставкадиз гьазурвал гьикI аквазватIа ва ам гьихьтин паярикай ибарат жедатIа, гьадакай и йикъара кьиле фейи пресс-конференциядал выставкайрин “АНЖИЭКСПО” центрадин генеральный директор Мукаил Исмаилова суьгьбетна. Мярекатда гьакIни “Анжиэкспо” ВЦ-дин директор Мегьамед Саругъланова, РД-дин ТПП-дин выставкайрин отделдин руководитель Гуьлпери Гьамзатовади иштиракна.
“Эцигунрин хел Дагъустан Республикадин экономикада кар алайбурукай сад я. “Эцигунар. Архитектура. Инновацияр — 2019” выставкади эцигунрин хилен базарди къе вуч теклифзаватIа, гьихьтин технологияр къвердавай артух ишлемишиз башламишзаватIа ва гьихьтин къарарар мукьвал тир вахтунда уьмуьрдиз куьчуьрмишиз эгечIдатIа, гьабурухъ галаз таниш жедай мумкинвал ачухарзава. Им яшайишдин кIвалер эцигзавайбурун проектрихъ галаз таниш хьун патални лап хъсан майдан я, выставкадин сергьятра аваз эцигунардайбурузни, инвесторризни чпи теклифзавай кIвалер, дараматар маса къачузвай ксарихъ галаз гуьруьшмиш жедай мумкинвал ава”, — малумарна М.Исмаилова, мярекат ачухуналди.
“Эцигунар. Архитектура. Инновацияр — 2019” амай маса выставкайрилай квелди тафаватлу я лагьайтIа, къейд ийин, им куь материалар ва тадаракар выставкадиз къведай ксариз — чпиз кIвалер эцигиз ва я абур ремонт ийиз кIанзавай Дагъустандин агьалийриз, гьакIни и кардал машгъул тир бригадайриз арада маса кас авачиз маса гудай, муьштерийриз куь продукциядикай, адан кьетIенвилерикай суьгьбет ийидай, абуруз ишлемишдай къайдаяр къалурдай мумкинвал я. Мадни ина квевай гъиле кьунвай карда амадагар ва я месэлаяр гьялдай маса къайдаяр жагъуриз, и хиле еке тежриба авай пешекаррихъ галаз меслятар ийиз жеда. И жигьетдай, выставкадин сергьятра аваз жуьреба-жуьре бизнес-гуьруьшар, презентацияр, семинарар кьиле тухун фикирда кьунва”, — давамарна ада.
М.Исмаилова хабар гайивал, эцигунрин хилез талукь сад лагьай выставка “Анжиэксподи” алатай йисан сентябрдиз кьиле тухванай. А чIавуз выставкадин сергьятра аваз гзаф конкурсар тешкилнай, гъалиб хьайибуруз къиметлу пишкешар ганай. И тежриба кваз кьуна, мярекатдин иштиракчийри вижевай пишкешрин фонд гьазурнава. “ШартIар гьихьтинбур ятIа, квевай, выставкадал атайла, чириз жеда. Амма исятда лугьун, и конкурсра гьам экспозицияр ачухнавайбуруз, гьамни мугьманриз иштиракдай мумкинвал ава”, — къейдна ада.
Мегьамед Саругъланова хабар гайивал, выставкадин программадик кваз эцигунрин ва чIагурунин дизайндин материалар ишлемишунин жигьетдай мастер-классар кьиле тухуда. ГьакIни ина пешекарри чпи чпихъ галаз рафтарвалдай чка тешкилда. Эцигунрин ва чIагурунин кIвалахар кьиле тухудайла, квез фикир гайитIа хъсан я, дуьздаказ гьикI ийида, гъалатIрикай кьил гьикI къакъудда — и ва я са жерге мукьвал-мукьвал гьалтзавай суалриз пешекарри жавабар гуда.
Республикадин мулкунал эцигунрин хилез талукь яз кьиле тухузвай тек сад тир и выставкадал карчийриз властдин векилрихъ, маса регионрай тир карханайрин пешекаррихъ галазни гуьруьшмиш жедай мумкинвал ачухда.
Выставкадин асул паяр: архитектура, проектламишун; эцигунардай ва чIагурунардай материалар, хъенчIин къапар, къванер; материалрин винел патар гьялдай жуьреяр, пенжеррин технологияр; ракIарар, фасадар, тадаракар, алатар; электрика; чимивилелди, целди таъминардай къурулушар; гьава михьи ийидай ва къурдай системаяр; дараматрин хатасузвал таъминарун; риэлторвилин къуллугъар ва икI мад.
Санлай къачурла, “Эцигунар. Архитектура. Инновацияр — 2019” выставка, тешкилатчийри инанмишарзавайвал, вири агьалияр патал итижлуди хьун лазим я. Выставкада иштиракиз кIанзавайбурувай тамам делилар “АНЖИЭКСПО” ВК-дин официальный сайтдай жагъуриз жеда: www.anjiexpo.ru. E-mail: info@anjiexpo.ru.
Жасмина Саидова
