Са сеферда заз туьквенда дезгедал “Самур” тIвар алай карханада некIедикай гьазурнавай шейэр: къатух, ниси, айран алаз акуна. За гьасятда фикирна, лезгийрин гьайбат я лагьана. Патав гвай дезгейрал “Дарман”, “ЦIийи кухня” карханайрин продукция алайтIани, виридан гъилер “Самурдал” физвай. Зани къачуна жуваз кIани мал. Дадмишайла, зазни хуш хьана.
Йикъарикай са юкъуз зун дуьз “Самур” карханадиз фена. Махачкъаладин “Дагхолод” комбинатдин гьаятда авай еке са цехда “Самур” вичин кардал машгъул тир. Ина хъсан ериш аваз дишегьлийри зегьмет чIугвазвай.
НекIедин сирер чидай и карханадин сагьиб лезги ваъ, къумукь яз хьана. Чина берекат авай, секин къилихрин инсан тир Камил заз ам Избербашда аваз хьайи чIавалай чидай. Шаиррин дестеяр а вахтара мукьвал-мукьвал карханайриз мугьман жедай. Камила а чIавуз Избербашдин нек гьялдай заводда кIвалахзавай. Заз ашкара хьайивал, гила ада регьбервал гузвай карханадал эцигнавай “Самур” тIвар са шумуд касдин тIварцIин сифте кьиле авай гьарфарикай ибарат хьанвайди я кьван. Гьелбетда, карханадин сагьиб тир Касимов Камила вичиз чи гуьзел Самур дере чидайдакай, анай вичихъ са шумуд дустни авайдакай лагьана.
Касимов Камил Мегьамедович Буйнакский районда авай са колхоздин МТФ-дин бригадир Мегьамедан хизанда дидедиз хьана. ГъвечIи чIавалай ам вичин диде-бубадихъ галаз мукьвал-мукьвал фермадал фидай. Хейлин вахт ана акъатзавайтIани, Камила школада хъсандиз кIелзавай. Гьа икI, вичин диде-бубадизни куьмекар гуз, гада рикIе чIехи къастар аваз яшамиш жезвай. Адаз гьа бередилай некIедин сирер чир хьана. А сирлу рекьер, гьелбетда, диде-бубади чирнай. Абур, вузар куьтягьнавачтIани а рекьяй, хъсан пешекарар тир.
Школа акьалтIарай Камил Ленинграддин некIедин промышленность патал пешекарар гьазурдай институтдик экечIна ва ам яру дипломдалди куьтягьна.
Жегьил пешекарди, хайи ватандиз хтана, Избербашдин гормолзаводда кIвалахиз башламишна. Сифте йикъалай ам вичин кеспидив гьакъисагъвилелди эгечIна. Заводда Касимов кьилин технологдин дережадив кьван агакьна. Адан эвелимжи везифа карханада гьасилзавай некIедин продукция хъсан еридинди хьун патал чараяр акуникай ибарат тир. Ада вичин тежриба ина кIвалахзавай жегьил пешекарризни чирзавай. Ина ам са шумудра жуьреба-жуьре шабагьризни лайихлу хьана.
Хейлин йисара и карханада кIвалахайдалай гуьгъуьниз Камил Мегьамедовича Махачкъалада некIедин вичин хсуси кархана ачухна. Са шумуд йис я, ада ина кIвалахиз, чи суфрайрал вичин продукция гъиз. “Самурдин” берекатар Дербентдиз, Самур дередизни агакьнава. Зи гьисабрай, бажарагълу ва тежрибалу пешекар К.Касимов некIедин чIехи са холдингдин кьиле акъвазуниз ярашугъ кас я. Ада регьбервал гузвай коллективда Самур дередай тир лезги дишегьлийрини кIвалахзава. Абур вири чпин директордилай рази я. ГьикI хьи, карханада зегьметдин къулай шартIар тешкилнава, хъсан мажибарни гузва.
Къуй Камил Мегьамедовичан “Самурдин” берекатар чи суфрайрал гьамиша булдаказ атурай.
Бикеханум Алибегова
