Интернетдай, дуьшуьшдай хьиз, “Чими салар-лакар (Теплые грядки)” тIвар алай видеороликар акурла, за дикъет гана. Пара менфятлу и кар, куь фикирдизни гъиз кIанзава, гьуьрметлубур.
Гьакъикъатда, ина ахьтин сир авач, чи камаллу бубайри гьамиша ийиз хьайи адетдин кар я, анжах парабуру рикIелай ракъурнава. Багъ-бустандин пешер, векьер-кьалар, набататрин амукьаяр — вири са фуруз вегьена, кутIуриз тадай. Гатфариз адакай хъсан кьук жедай. Ам миянардай шей яз картуфрикни, маса набататрикни кутадай. Нетижада зулуз багъ-бустан михьи, гьа са вахтунда бегьерлувал артухардай мумкинвални жезвай.
Сал чими ийиз квелай башламишда? Багъда са артух ишлемиш тийизвай чка акуна хьиз, ана 0,5 метрдин дерин фур эгъуьнда. Месела, 3х1 метрдин и фуруз (адан къерехра-цлара куьгьне шифер туртIа, мадни хъсан я) ктIай кIарас-кIанчI, црцIер вегьеда. Винелай гьа фурай акъудай са 20-30 см кьван накьв вегьеда ва яд туна, фур ацукьарда. Пакад юкъуз чна багъ михьна кIватIай пешер, векьер-кьалар (месела, са 30 см) хъивегьна, винелай мад са 10-20 см накьв гуда. Мадни яд туна, фур ацукьарда. И къайдада, чилихъ галаз сад жедалди. Гатфаралди адакай ктIана, цIай гьатна, салариз вегьедай пурпу кьук жеда. Гьа ихьтин чими фура-сала гатфарин кьиляй картуфар цайитIа, хъсан бегьер гуда. Ихьтин фурукай, винелай целлофан вегьена, хъуьтIуьз тIуьн патал кIешниш-чичIек цадай гъвечIи парник авуртIани жеда.
Ихьтин чими саларихъ пара аламатар авайвиляй, Урусатда и кардиз пара фикир гузва, гъвечIи чкадилай еке бегьерар къачузва.
Юсиф Саркаров, Ахцегь
