2009-йисан гатун сад лагьай вацран эхирар тир. Милициядин къуллугъчи Лямет Абасов, вичиз адет хьанвайвал, фу-затI тIуьна, кIвалахал рекье гьатна. 29 йис хьанвай милиционерди Дербент шегьердин къенепатан крарин отделда (ГОВД) къуллугъзавай. Ам ГОВД-дин дараматдал гуьзчивал тухун патал йифен сменада амукьна кIанзавай. РикI мурадривни къастарив ацIанвай, вилик гьеле тамамарна кIанзавай гзаф крар кумай, кьве аялдин буба Лямета и югъ вичин уьмуьрда эхиримжиди я лагьана гьич фикирдизни гъаначир жеди. Амма гьакъикъат масад хьана.
30-июндин йифен сятдин 12 тамам жез са шумуд декьикьа амайла, садлагьана са шумуд терефдихъай малум тушир ксари Дербент шегьердин ГОВД-дин дараматдиз гуьлле гуз гатIунна. Лямет Абасован ва адахъ галаз дежурствода авай муькуь милиционеррин макьсад гуьлле гузвайбур дараматдиз мукьва хьунин вилик пад кьун тир. Абурун арада халис дяведин гьерекатар кьиле фена. Гуьллеяр гун саки 5 декьикьада давам хьана. Бандитри кьулухъ чIугуна, абур ракьун рехъ галай патахъ катна. И женгина Лямет Абасован уьмуьрдин гъал кьатI хьана.
Гьужумди вири шегьердин секинвал чIурна. Ягъунар кьиле фейи чкадал гьасятда къанун-къайда хуьдай органрин, прокуратурадин векилар, силисчияр атана ва анал ахтармишунрив гатIунна. Тамам кьве сят арадай фейидалай кьулухъ ГОВД-диз мукьва хьиз акъвазарнавай са машин хъиткьинна. Нетижада 12 касдал хирер хьана. Абурун арада жергедин агьалиярни авай.
Лямет 1980-йисуз Къазахстанда кIириви Агьмедан хизанда дидедиз хьана. Юкьван мектеб акьалтIарайдалай кьулухъ ада армиядин жергейра къуллугъна, гуьгъуьнлай таможнядин къуллугъдин институтда кIелна.
2004-йисуз Лямет Абасов Къазахстандай Дербентдиз куьч хьана. 2007-йисуз ам Дербент шегьердин ГОВД-да, ППС-дин къуллугъчи яз, кIвалахал акъвазна. Къанун-къайда хуьдай органра зегьмет чIугур кьве йисан къене викIегь лезги хци вич кар алакьдай, жавабдар, намуслу инсан тирди тестикьарна. И йисара адаз Губденда, Махачкъалада къанлуйриз акси махсус серенжемра иштиракунни кьисмет хьана. Дагъларин уьлкведа ислягьвал хуьн патал Лямет Абасова, кьегьал хейлин маса дагъустанвийри хьиз, вичин чан къурбандна.
Дирибаш хва телеф хьана са шумуд йис алатайдалай кьулухъ адан экуь къамат эбеди яз рикIера хуьнин мураддалди Дербент шегьердин куьчейрикай сад Лямет Абасован тIварцIихъ яна. Лагьана кIанда, и месэла кьилиз акъудуник республикадин машгьур общественно-политический деятель Имам Яралиева еке пай кутуна.
Куьче тIварцIихъ ягъунин мярекатда Лямет Абасован хизанри, мукьва-кьилийри, адахъ галаз санал кIвалахай юлдашри, Дербент шегьердин администрациядин, общественный тешкилатрин векилри, школьникри иштиракна. Анал рахайбуру Л.Абасован вафалувиликай, кьегьалвиликай, ватанпересвиликай чпин фикирар лагьана ва адан экуь къамат эбеди яз рикIера амукьдайди къейдна.
Дагъустанда ислягьвал хьун патал гзаф дагъвийри чанар къурбандна. Абурун тIварар, садрани туьхуьн тийидай гъетер хьиз, чи рикIера эбеди яз амукьда.
Агьмед Магьмудов
