Декабрь Бейбутов — Дагъустан АССР-да Центральный телевиденидин ва Вирисоюздин радиодин хсуси корреспондент. Россиядин Федерациядин ва Дагъустан АССР-дин культурадин лайихлу работник, Дагъустан Республикадин Государстводин премиядин лауреат.
Уьлкведа ва дуьньяда тIвар-ван авай инсанрикай (Леонид Брежнев, Лев Яшин, Георгий Байдуков, Святослав Фёдоров, Расул Гьамзатов, Марк Бернес, Сали Сулейман, Борис Петровский, Рашид Аскерханов, Нариман Алиев, Мегьамед Толбоев, Александр Кудрявцев, Ян Френкель, Мурад Кажлаев…) итижлу репортажар, телепередачаяр гьазурай кас. Ада 30 йисуз кьван Центральный телевиденидин корреспондентвиле кIвалахна.
Эсил Ахцегь райондин Хуьруьгрин хуьряй тир бажарагълу журналистди неинки уьлкведиз, гьакI дуьньядизни, Дагъустан устIаррин, устадрин, шаиррин, художникрин, хуьруьн майишатдин зегьметчийрин, гидростанцияр эцигзавай зарбачийрин уьлкве тирди раижна. Декабрь Бейбутова алемдин агьалийрин рикIера Дагъларин уьлкведин тикрар тежер хьтин гуьрчег къамат арадал гъана. Адан гьар са телерепортаж уьлкведин культурадин ва общественный уьмуьрда зурба вакъиадиз элкъвезвай. Ада Центральный телевидение патал гьазурзавай телепередачайрай Калининграддилай Владивостокдал кьван яшамиш жезвай Советрин Союздин агьалийриз багълара, салара, промышленный карханайра, электростанцийрал зегьмет чIугвазвай, спортда, илимда, культурада агалкьунар къазанмишзавай дагъустанвийрикай чир жезвай.
Дагъустан дуьньядиз машгьур авур, Дагъларин уьлкве патал зегьмет чIугур касдин тIвар эбеди авун патал РД-дин Кьилин патав гвай талукь комиссиядиз чарар кхьейла, анай гьар йисуз “ам ахьтин гьуьрмет авуниз лайихлу кас туш” лугьуз жавабар хкведай. Гена региональный журналистика вилик тухудай “Каспий-медиа” Центрадин теклифдиз РД-дин Кьилин патав гвай комиссиядин цIийи членар килигна ва дуьзгуьн къарарни кьабулна, журналистикадин къагьримандин лайихлувилер фикирда кьуна. ИкI, алатай гьафтеда Махачкъала шегьердин Манташеван (Оскаран) куьчеда Декабрь Керимович Бейбутов яшамиш хьайи кIвалерин цлал мемориальный кьул эцигна. И мярекатдал рахай РД-дин Гьукуматдин Председателдин Сад лагьай заместитель Анатолий Къарибова Декабрь Бейбутова Дагъустандиз вафалувилелди къуллугъайдакай, ам вичин девирдин зурба летописец хьайидакай лагьана.
“Каспий-медиа” Центрадин правленидин председателдин заместитель Алик Абдулгьамидова Д.Бейбутован тIвар эбеди авунин карда куьмек гайи “Сауно-квант” Центрадин руководитель Гьамза Мегьамедоваз ва Махачкъала шегьердин администрациядин аппаратдин руководителдин заместитель Абуталиб Мамаеваз сагърай лагьана.
Чи мухбир
