Республикада общественный, алиш­веришдинбур тушир хейлин организа­цияр ава. Абурукай садни “Дагъустандин дишегьлийрин Союз” ДРОО я. Республикадин саки вири муниципалитетра талукь отделенияр авай чIехи организация. Ам кардик кваз къанни вад йисалай виниз алатнава. Адан жергейра Дагъларин уьлкведин тIвар-ван авай алимар, писателар, культурадин ва искусстводин деятелар, муаллимар, хуьруьн майишатдин, промышленностдин, спортдин векилар ава. Абуру мергьяматлувилин, образованидин, яшайишдин проектра, мярекатра гьевесдивди иштиракзава, лазим вахтунда дишегьлийрин ихтиярар хуьзва. Республикада пайгарвал, хъсан гьалар хьунни дишегьлийрин алахъунрихъ, кIвалахдихъ галаз алакъалу тирдал са шакни алач.

Алатай гьафтеда республикадин Р.Гьамзатован тIварунихъ галай Милли библиотекада “Дагъустандин дишегьлийрин Союзди” тешкилнавай “Къула чим хуьзвайбур ва алай аямдин общест­вода абурун роль” темадай элкъвей стол кьиле фена. Адан кIвалахда республикадин шегьеррай, районрай атанвай дишегьлийри иштиракна.

Союзди хизандин институтдин дибар ва хизанрин тарифлу адетар хуьниз, мягькемаруниз талукьарнавай социальный проект туькIуьрнай ва ам РД-дин Кьилин грантдизни лайихлу хьанай. Элкъвей столдихъ гьа и месэладиз талукь ихтилатарни кьиле фена. Иштирак­чийри дишегьлийрик, хизанрик алай аямда секинсузвал кутазвай хейлин месэлаяр къарагъарна, веревирдер авуна, тухузвай кIвалахдихъ хъсан нетижаяр жедай теклифар гана.

— Проектдин  кьилин макьсад сад я: дишегьлидив къула чим хуьнин вичин ве­­зифа вахкун, яни алай вахтунда арадал къвезвай яшайишдин месэлаяр гьялунин, хизанрин цIийи къайдаяр арадал­ гъунин карда Дагъустандин халкьдин адетрикай, фадлай тестикь хьанвай хизандин ахлакьдинни марифатдин ерийрикай менфят къачудайвал,- лагьа­на “Да­гъустандин дишегьлийрин Союз” ДРОО-дин председатель Интизар Маму­таевади.- Проект кьилиз акъудун патал махсус дестеяр тешкилнава ва абурун куьмекни галаз чка-чкада хизандин, дишегьлидин важиблу месэлайриз талукьарнавай элкъвей столар, мастер-клас­сар, тренингар тухуда.

Проект уьмуьрдиз куьчуьрмишдайла хизанрин яшайишдикай, абурал ацалт­завай кьван четинвилерикай, дидеяр, дишегьлияр кIевера твазвай месэ­лайрикай ва исполнительный властдин, гражданвилин обществодин куьмекни галаз абур гьялдай рекьер жагъуруникай­ вахт-вахтунда общество хабардарда.

И.Мамутаевади къейд авурвал, Дагъ­­­ларин уьлкведин агьалийрин 55-57 процент ди­шегьлияр я. Обществода пайгарвал хуьнни, хьунни абурун крари­лай гзаф ас­лу жезва. И кар фикирда кьуна, гьукум­­дарри дишегьлийрал важиблу къул­лу­гъар­ни ихтибарзава. Алай вахтун­да­ 7 ди­шегь­ли РД-дин Халкьдин Собрани­дин де­путатар я. Са шумуд дишегьлиди мини­с­терствойриз, ведомст­войриз регьбервал гуз­ва. 17 дишегьлиди­ шегьеррин ва рай­он­рин муниципалитетрин кьилерин­ за­мес­тителрин везифаяр кьиле тухузва. Хей­­­лин дишегьлияр региональный обще­ст­венный организацийрин руководителар я.

Элкъвей столдихъ “Дагъустандин адетдин хизанда дишегьлидин роль”, “Алай аямдин обществода хизандин милли адетар хуьз жедани?”, “Хизан ва дин, исламдин хизан ва санал яшамиш хьунин къайдаяр”, “Светский обществода хизандин институтдин везифаяр” темайрай докладар кIелна.

Хийир Эмиров