Республикада дзюдо машгьурунин ва спортдин и жуьредал машгъул жегьилрин устадвилин дережа хкажунин, РД-дин хкягъай дестедик кутадай къуватлу спортсменар тайинарунин макьсаддалди и йикъара Советрин Союздин Игит Абас Исрафилован тIварцIихъ галай Мегьарамдхуьруьн спорткомплексда 2004-2006-йисара дидедиз хьайи гадайрин ва рушарин арада дзюдодай Дагъустан республикадин кIвенкIвечивал патал акъажунар кьиле фена.
«Лезги газетдиз» Мегьарамдхуьруьн райондин администрациядин пресс-къуллугъди хабар гайивал, къейднавай акъажунра республикадин шегьеррайни районрай 180 жаван дзюдоистди иштиракна.
Кьве йикъан къене кьиле фейи бягьсерин нетижада Дербент шегьердин команда гъалиб хьана. Кьвед лагьай чка Мегьарамдхуьруьн ва пуд лагьай чка Махачкъала шегьердин командайри кьуна. Гъалибчияр ва приздин сагьибар медалралди, дипломралди ва кубокралди къейдна.
«Лезги газет»
