Беделов Фейруз Абумуслиман хва (Фейруз Беделахтул) — журналист, писатель, алим я. Ам 1949-йисан 22-мартдиз Азербайжан ССР-дин КцIар райондин ТIигьир хуьре дидедиз хьана. 1977-йисуз Бакуда Азербайжандин госуниверситетдин журналистикадин факультет яру дипломдалди акьалтIарна. СССР чкIидалди республикадин компартиядин ЦК-дин “Совет кенди” (“Советрин хуьр”) газетда мухбир, отделдин заведующий яз кIвалахна.
Ф.Беделовакай Азербайжанда акъатзавай “Самур” газетдин сад лагьай, 1993-1994-йисара Бакуда акъатай лезгийрин аслу тушир “Алпан” газетдин кьилин редактор хьана, 1994-йисан злалай Дербентда муаллим яз кIвалахзава. Ам Россиядин писателрин, журналистрин союзрин член, тарихдин илимрин кандидат я.
Сифте эсерар чапдиз алатай асирдин 60-йисара акъатай автор КцIарин халкьдин яратмишунрин кIвале Забит Ризванова арадал гъайи “РикIин гаф” кIватIалдай “лув ганвайбурукай” сад я. Ада 1993-йисуз Бакуда лезгийрин литературада мифологиядин сад лагьай роман — “Миф” чапдай акъудна. И эсер Азербайжанда лезги чIалал акъатай сад лагьай роман хьана. Дербентдин социально-педагогический институтдин муаллим Тамела Абдурагьмановади “Миф” романдикай “Мифопоэтическая модель мира в романе Ф.Бадалова “Миф”: к проблеме евразийского контекста современной лезгинской литературы” темадай илимдин диссертация кхьена.
Алатай йисара автордин “Филиал”, “Часпар”, “Цаварилай хтай лезги” “Яру квасани ЦIару кваса” къемедаяр, “Яран сувар” тIвар алай этнографиядин композиция СтIал Сулейманан тIварунихъ галай госмуздрамтеатрди сегьнедал эцигнава. Ам гьакIни “Аламаз”, “Тарашхана” къемедайрин, “Патриархни пачагьдин паб” тIвар алай тарихдин драмадин ва маса эсеррин авторни я. 2011-йисуз автордин “Яру стIалрин марф” (Москва, 520 ч.) тIвар алай кIватIал чапдай акъатна.
Ф.Беделов лезги халкьдин тарихдикай кхьенвай пуд томдин, гьакIни Москвада, Бакуда, Дербентда, Грозныйда, Махачкъалада акъатнавай яхцIурни цIудалай гзаф илимдин макъалайрин автор я.
“Лезги газетдин” редакциядин коллективди Фейруз Беделоваз 70 йисан юбилей мубаракзава, адахъ мягькем сагъламвал, хизанда хушбахтлувал ва мадни агалкьунар хьун кIанзава.
Ф.Беделахтулан эсерар сайтда и ссылкадай кIелиз жеда.
«Лезги газет»
