21-март Виридуьньядин шииратдин югъ я. И кардин гьакъиндай къарар 1999-йисуз ЮНЕСКО-дин Парижда кьиле фейи генассамблеядин 30-сессиядал кьабулнай. Адахъ галаз алакъалу яз, и юкъуз шииратдин сувар тешкилунин асул метлеб шииратдин куьмекдалди чIаларин жуьреба-жуьрвал хъсан яз гьисабун, квахьзавай чIаларин тереф, абур чеб хуьн, поэзия виликди финиз куьмекун, шиирар хуралай устадвилелди кIелунин адетдал, и рекьяй тарсар гунал хтун, шииратдинни искусстводин амай жуьрейрин арада диалог арадал хкун, издательстводин кIвалах ва массовый информациядин такьатра, инсанриз ачух, алай аямдин халис искусстводин хьиз, шииратдин дуьзгуьн къамат арадал гъун я.
Грек чIалай таржума авурла, “поэзия” яратмишун, арадал гъун, туькIуьрун лагьай чIал я. Гьисабзавайвал, шииратдин лап къадим эсер чи асирдал къведалди гьеле 23 лагьай виш йиса кхьенай. Абур Аккаддин пачагьдин руш ва диндин чIехи къуллугъчи Энхедуаннадин шиирар — гимнияр тир лугьуда. А гимнияр пакбур яз гьисабзавай.
Шииратдин жуьре Европада та Возрожденидин девирдалди, гуьзелвилин асул шартI хьиз, сейли ва гаф искусстводиз элкъуьрунин тек са рехъ, алат тир.
Виридуьньядин шииратдин сифте югъ 2000-йисуз ЮНЕСКО-дин штаб- квартира авай Парижда къейдна. Москвада лагьайтIа, и сувар сифте 2000-йисан 21-мартдиз Таганкада авай Театрда кьиле тухвана. 2009-йисалай Шииратдин йикъаз талукь мярекатар литераторрин Центральный КIвале тешкилзава. И йикъаз талукьарнавай мярекатар чи республикадани кьиле тухузва.
«Лезги газет»
