—     Дамарра ивидин гьерекат хкаж хьанвайла, хуьрекдин 2 тIу­ру­на авай кьурурнавай чIулав цIирицI­рин тваррал са стакан кузвай яд илична, зайиф цIал эцигна, 10 де­кьи­кьада ругуна, са сятда тада. Ах­па йикъа 4 сеферда 1/4 стаканда авай­ди ишлемишда.

—     Мадни, дамарра  ивидин гьерекат йигин хьанвайла, 100 г куьлуь авунвай кишмишрал са стакан яд илична, 10 декьикьада зайиф цIал ргада. Ахпа ам куьзна, йикъа 2 сеферда хуьрекдин 1-2 тIуруна авайди ишлемишда.

ГьакIни хуьрекдин са тIуруна авай вирт  минеральный цик цIурур­на, лимондин са паюнин миже алава хъувуна, экуьнахъ чайдин ва я кофедин чкадал хъвада.

—     РикIи акъвазиз-акъвазиз кIва­лахдайла, чайдин 2 тIуруна авай календуладин цуькверал 2 стаканда авай ргазвай яд илична, са сятда тада. Ахпа 1/2 стаканда авайди йи­къа 4 сеферда ишлемишда.

—     Шекердин азар авайла, лаврдин 10 пешинал 3 стаканда авай ргазвай яд илична, 2 сятда тада, йи­къа пуд сеферда 1/2 стаканда авайди хъвада­­.

—     Гъилерал матIар акьалтнавайла, 2 лимондин чкалар куьлуь авуна, 1/2 стаканда авай  9 процентдин столовый сирке уксус илична, са гьафтеда тада. Ахпа адай памбаг кьежирна, йикъа са шумуд сеферда матIарал эцигда.

—     Гъилин ва кIвачерин кикерик цIарнах квайла, памбаг новокаиндай кьежирна, йикъа 2 сеферда кикеривай гуьцIда. Хъсан нетижа гун патал­ новокаиндилай гуьгъуьниз алоэдин мижени гуьцI хъийида. 3-4 юкъуз ихьтин дарман ишлемишайла, цIар-нах михьиз хкатда.

—     Вилел мухатIил акьалтнавайла, хуьрекдин са тIуруна авай алоэдин пешерал са стаканда авай ругунвай къайи яд илична, 6 сятда тада. Ахпа ам куьзна, вилиз компресс ийида.

—     Дамарра ивидин гьерекат йигин хьанвайла, гьар юкъуз ичIи ри­­кIелай чайдин са тIуруна авай ругунвай цик пуд стIал алоэдин миже хуькуьрна хъвада. Кьве вацралай дамарра ивидин гьерекат къайдадиз хкведа.

—     Гриппдик азарлу хьанвайла, шуьшедин гъвечIи къапуниз хуьрекдин са тIуруна авай валериана, нашатырдин спирт ва ичерин сирке вегье­на, хъсандиз юзурда. Ахпа ам цIве­л­е­­ривай, япан кьулухъ патаривай  гуьцIда ва са йикъан къене ни чIугва­­да. Ихьтин къайда ишлемишуни ифи­нар ва зуькемар алудизни куьмекда.

—     Кьил элкъвезвайла, хуьрекдин са тIуруна авай кьурурнавай иний­рал ргазвай са стакан яд илична, 2 сятда чими чкада хуьда. Куьз­­на­, йи­къа 3-4 сеферда фу недалди вилик хуьрекдин 1/2 тIуруна­ авайди хъвада.

—     КуручIрай иви къвезвайла, еке са газардикай ва келемдин 1/4 па­­юникай миже хкудна, сад-садак кака­дарна, ргазвай яд (1:1) алава хъувуна, йикъа 5 сеферда сиве экъуьрда­.

—     Нервияр къайдадикай хкатнавайла, чайдин 10 тIуруна авай китайский лимонникдин тумунал 70 процентдин 300 мл спирт илична, 8-10 юкъуз тада. Йикъа 2-3 сеферда ичIи рикIелай, я тахьайтIа фу тIуьр­да­лай гуьгъуьниз 4 сятдилай 20 стIал ишлемишда. Сагъарунин вахт 20 югъ я.

Гьазурайди — Надият Велиева