Докъузпара районда Яран сувар гьар йисуз гурлудаказ кьиле тухузва. ЦIинин йисузни, адет тирвал, милли сувар Мискискарин хуьре, 21-мартдиз кьиле фида.

Суварин юкъуз райондин вири хуьрери кьилдин майданар тешкилда, милли тIуьнар алай суфраяр къурмишда. ЦIилинин пагьливанри, Дагъустандин манидарри, кьуьлердайбурун дестеди инсанрин гуьгьуьлар шадарда. Суварин сергьятра аваз халкьдин дуланажагъдихъ галаз алакъалу къадим затIарин выставкани тешкилда.

Сувар кьиле тухудай юкъуз кьиле фидай важиблу ва итижлу серенжемрикай сад спортдин милли жуьрейрай кьиле фидай акъажунар я. Акъажунар сятдин 9-даз башламишдайвал я. Тешкилатчийри малумарзавайвал, 1, 2, 3 лагьай чкаяр кьурбуруз дипломар ва пулдин пишкешар гуда. Къейд ийин, акъажунра райондин вири хуьрерин агьалийривай иштиракиз жеда.

«Лезги газет»