Гьар са кардин иеси адал рикI алай касдикай жеда, лугьузва халкьдин мисалда. Заз акI жезва хьи, и гафар Аюбова (Салигьова) Фезина Мигьралиевнадизни талукь я.
Мегьарамдхуьруьн райондин Ярагъ-Къазмайрин хуьре, тIебиатдин гуьрчег маканда 1962-йисан 24-апрелдиз дидедиз хьайи руш гуьзелвилин, нурлу гьиссерин таъсирдик кваз чIехи хьана. Хуьруьн юкьван мектебда чирвилер къачур руша муаллимвилин кеспи хкяна.
Фезина ругуд аял — вад вахни са стха авай зегьметчи хизанда чIехи хьана. Абуру вирида хъсан чирвилер ва тербия къачуна, гьар сад са пешедин иеси хьанва. Фезина Мигьралиевнадин пуд вах муаллимар я: кьвед — урус чIалан ва литературадин, садни — математикадин.
1979 — йисуз хайи хуьруьн юкьван мектеб агалкьунралди акьалтIарай ва эрзиман мурадди ялзавай Фезина ДГУ-дин филологиядин факультетдик экечIна. 1986-йисуз, университет агалкьунралди куьтягьуналди, муаллимвилин пешедин сагьиб тирди тестикьарзавай диплом къачуна.
Ада рикIел хкизвайвал, еке гьевесдивди кхьей “Урус ва лезги чIалан зоосемизмаяр” дипломдин кIвалах акурла, руководителди жегьил пешекардиз аспирантурадиз гьахьун ва университетда кIвалахиз акъвазун теклифнай. Амма Фезина Мигьралиевнади вичин рикI алай пешедал машгъул жез тади ийизвай — ада Махачкъаладин 7-нумрадин мектебда урус чIалан ва литературадин тарсар гуз башламишна.
Кьве йисуз кIвалахайдалай кьулухъ ам яшамиш жезвай кIвализ мукьва хьун патал меркездин 17-нумрадин мектебдиз атана. Ина Ф.Аюбовади вад йисуз кIвалахна.
1993-йисуз, уьмуьрдин юлдашдин къуллугъ себеб яз, ам хайи хуьруьз хтана. Са йисалай Ярагъ-Къазмайрин юкьван мектебда кIвалахиз башламишна, и кар къенин йикъалди давамарзава. Сифтедай — урус чIалан ва литературадин муаллим, гуьгъуьнлай 8 йисуз тербиядин рекьяй директордин заместитель хьана. 2016-йисалай инихъ тежрибалу муаллим Фезина Мигьралиевнади и мектебдиз регьбервал гузва.
Яргъал йисарин бегьерлу зегьметдин нетижада Фезина Аюбова “Россиядин Федерациядин умуми образованидин лайихлу работник” лагьай тIварцIин сагьиб хьанва. Ам чIалан девлетлувилелди, пешедиз вафалувилелди неинки чирвилер, гьакI рикIни кваз аялриз гуз гьазур хьуналди тафаватлу жезва.
2018-йисан 1-сентябрдилай Ярагъ-Къазмайрин хуьруьн аялри цIийи мектебдин дараматда чирвилер ва тербия къачузва. Инал заз къейд ийиз кIанзава хьи, хуьруьнвияр патал фадлай гуьзлемишай багьа савкьат хьайи цIийи мектебда кIелзавай аялар зегьметдал рикI алайбур, кIелунра чалишмишвал ийидайбур, гьар са кардай кьил акъудиз алакьдайбур я. Абуру райондин ва республикадин гзаф мярекатра, олимпиадайра, конкурсра иштиракзава ва гъалибвилер къазанмишзава.
Фезина Мигьралиевнадиз кайванивилин, дидевилин бахтни хъуьрена. Ада уьмуьрдин юлдаш Анвар Къаибовичахъ галаз санал туькIвей хизан арадал гъана, 3 велед чIехи авуна, 7 хтул тербияламишзава.
Чи мурад зегьметдал рикI алай муаллимдихъ мягькем сагъламвал, хизанда бахтлувал, кIелзавай аялрихъни экуь гележег, кIвалахда мадни кьакьан дережайрив агакьун я.
Квез 8-Мартдин сувар мубаракрай, гьуьрметлу Фезина Мигьралиевна!
Саида Мурадова
