Сулейман-Стальский райондин мулкарай федеральный, республикадин ва чкадин метлеб авай ре­кьер­ фенва. Гьелбетда, абур къайдада аваз хуьн, къулайбур ва хатасузбур авун — им республикадин “Даг­ав­тодор” ООО-дин хиве авай везифа я. ЯтIани, авай мумкинвилериз килигна, райондин руководстводи, администрациядин талукь къурулушрини рекьер, гьакIни хуьрерин куьчеяр къайдадиз гъунин, анра къир цунин жигьетдай еке кIвалах тухузва. И кардик кьилдин ксарини чпин пай кутазва. ИкI, эхиримжи сад-кьве йисуз райондин рекьерин фондунин ва кьилдин ксарин пулунин такьатрин гьисабдай Кьасумхуьруьн, Дар­кIуш-Къазмайрин, ЦIийи Ма­кьарин, Агъа СтIалрин, Вини СтIалрин, КIвар­чагъ­рин ва маса хуьрерин гзаф куьчейра къир цана, и кIвалах районда давамни жезва.

— Эхиримжи вахтара Кьасумхуьруьн поселенидик акатзавай хуьрера рекьерни куьчеяр, паркар, общественный дараматрин вилик квай майданар аваданламишунин, къайдадиз гъунин, къир цунин барадай ил­лаки еке кIвалах тухванва, — лу­гьуз­ва райондин кьилин 1-заместитель Лацис Оружева. — Районда къай­дадиз хкидай, къир цадай, аваданламишдай рекьер, куьчеяр тайи­нарнава. Сифте нубатда чпихъ яша­йишдин метлеб авай, образованидин, здравоохраненидин, культурадин объектар, гьакIни сурарал физвай рекьерни куьчеяр къайдадиз гъизва. Санлай къачурла, эхиримжи­ 3-4 йисуз райондин хуьрера 40-далай виниз куьчейра къир цана.

Чаз малум хьайивал, алай йисан августдин вацра Сийидрин хуьре яргъивилел 110 метр алай, сура­рал физвай Петр Усларан куьчеда 550 квадратный метрдин майданда, Кьасумхуьрел Керимован куьчеда ва сурарин вилик квай майданда (санлай 1800 квадратный  метрдин майданда)  къир цана.

Райондин администрациядин капитальный эцигунрин управленидин начальникдин заместитель Герман Гьуьсейнова чаз лагьайвал, Кьасумхуьрел кьилин куьчейра къир цун патал бюджетдик рекьерин фон­дунай 8 миллион манат пул кутунва. Мукьвара Кьасумхуьрел Гьасанован куьчедани къир цана. ЦIийи поселокда Набиеван куьчеда къир цада.

Райондин кьил Н.Абдулмуталибов и йикъара къир цанвай куьчейриз фена, кIвалахар тухванвай гьалдихъ галаз таниш хьана.

Хазран Кьасумов