Алатай гьафтедин ял ядай йикъара Волгоград шегьерда Вирироссиядин грэпплингдин федерациядин важиблу акъажунрикай сад тир “5 гъед”   турнир кьиле фена. Адан нетижайрал асаслу яз грэпплингдай дуьньядин чемпионатда иштиракун патал Россиядин хкянавай команда туькIуьрзава, гьавиляй спортдин и жуьредай уьлкведин виридалайни викIегь пагьливанар ина кIватI хьун дуьшуьшдин кар тушир.

Турнирда Дагъустандин спортсменрини чпин устадвал къалурна. ИкI, акъажунрин сад лагьай юкъуз заланвилин вири категорийрай (62, 66, 71, 77, 84, 92, 100, 100 кг-дилай артух) 1-чкаяр чи республикадин спортсменри кьуна. Гуьгъуьнин юкъуз грэпплинг-ги жуьредай кьиле фейи акъажунрани дагъустанвийри усалвал къалурнач. ИкI, заланвилин 5 категориядай абуру къизилдин медалар къазанмишна. Шадвилелди мадни а кардикай хабар гуз кIанзава хьи, и турнирда устадвал къалурайбурун ва виниз тир нетижаяр къазанмишайбурун арада чи ватандаш Артур Агъашириновни ава. Ам грэпплингдай -2 ва грэпплинг-ги жуьредай 1-чкайриз лайихлу хьана. ИкI, А.Агъаширинова ва кIвенкIвечи чкаяр кьур амай спортсменри грэпплингдай Бакуда кьиле фидай дуьньядин чемпионатда иштиракдай мумкинвал къазанмишна.

Рагнеда Рамалданова