957-йис. Каспийдин къерехра чилер зурзана. Нетижада бязи чкайрал яд акьалтнай. Им еке мусибат тир.
1667-йис. Самурдин вини кьилера (гила Рутул райондин территория) гзаф къуватлу залзала хьана. Агьалийриз еке зиянар гана: дараматар чкIана, гьатта инсанар харапIайрик акатна. Тарихдин чешмейри шагьидвал ийизвайвал, чилер зурзаз башламишайла, Мишлешрин иман гвай агьалийри 93 аял хуьруьн мискIинда чуьнуьхна. Гьайиф хьи, абур вири, Аллагьдин кIвал чкIай харапIайрик акатна, телеф хьана.
1668-йис. Къуватлу залзаладик Шемаха ва ЦIахур шегьерар чкIана. Идан гьакьиндай Мишлешрин хуьре жагъай са къванцел алай кхьинри шагьидвал ийизва: “Гьижредалди 1078-йисан шабан вацран киш юкъуз залзала хьана. Хуьр мискIинни кваз чкIана. Нетижада 170 кас телеф хьана…” Залзала хьайи киш югъ 1668-йисан январдал гьалтзава.
1688-йис. Ахцегьа залзала хьана.
1830-йис. 9-мартдиз гилан Казбек райондин территорияда чилер зурзана. Залзаладин къуватлувал 8 баллдиз барабар тир. Алмак хуьруьз еке зиянар хьана. Инчхеда мискIин чкIана, 23 кас телеф хьана. Идан гьакъиндай мискIиндин цла авай къванцел кхьенва.
Агъсакъалри тестикьарзавайвал, а вахтунда маса хуьреризни еке зиянар хьана: Зубутлида 42 кас, Миатлида 63 кас телеф хьана. Хейлин агьалияр яргъал йисара кIвал югъ амачиз амукьна.
1849, 1851 (апрель, май), 1852 (февраль, ноябрь), 1853, 1855-йисара Дербент районда чилер зурзана.
1896-йис. Къайтагъ-Табасаран округда чилер зурзуникди Карацан хуьре 12 кIвал чкIана, 27 кIвал са гъир-билдал аламукьна.
1905-йис. 14-февралдиз Самурский округдин Ахцегьрин хуьре гужлу залзала хьана. Адан “ялавар” Дербент шегьердихъ, Кьасумхуьруьхъ ва Куьре округдин бязи маса хуьрерихъни галукьна.
1911-йис. Куьре округда чилер зурзуникди иллаки еке зиянар ХпитIрин ва Уллу-Гъетегърин хуьрериз хьана.
1913-йисан 12-мартдиз Куьреда ва Дербентда залзаладик 36 хуьр чкIана (адан къуватлувал 7 баллдиз барабар тир.
1931-йисан 20-октябрдиз Дербент районда 6 баллдин залзада хьана.
1948-йисан 30-августдиз залзалади Кьасумхуьруьн, Мажалисдин агьалияр къарсурна.
1950-йисан 31-августдиз Первомайскда ва Суваровскда 6 баллдин залзала хьана.
1955-йисан 5-август. Махачкъаладин патарив 6-7 баллдин залзала хьана.
1960-йисан 21-мартдиз Махачкъаладинни Каспийск шегьеррин агьалийрин секинвал йифен сятдин 12-даз хьайи залзалади чIурна.
1966-йисан 2-мартдиз Грозный шегьердин патав 7 баллдин, 20-апрелдиз Кьиблепатан Дагъустанда — 8 баллдин залзала хьана.
(Делилар Дагъустандин алимри 1970-йисан залзаладиз талукь яз кхьей материалрай къачунвайбур я)
