Аваданда Докъузпара райондин спортшколадин филиал ачухна 10 йис я. Ина футболдай, азаддаказ кьуршахар кьунай ва какахьай акъажунрай секцияр кардик ква.
Какахьай единоборствойрай ина жегьил муаллим-тренер Рагьимханов Сельдар Мурадхановича аялриз 2013-йисалай вердишвилер ва чирвилер гузва. Ада 2012-йисуз Ханты-Мансийский автономный округда Югорский госуниверситетдин физкультурадин факультет акьалтIарна. КIелдай йисара ам спортдал рикIивай машгъул хьана, университетдин спортдин уьмуьрда иштиракна, Уралдин округдин кIвенкIвечивал патал акъажунра приздин чкаяр кьуна. Сельдар муаллим какахьай единоборствойрай, каратэдай спортдин мастервиле кандидат я.
С.Рагьимханован гъилик вердишвилер къачузвай аялри 2018-йисан декабрдиз ДагОгни шегьерда какахьай единоборствойрай РД-дин кIвенкIвечивал патал кьиле фейи акъажунра иштиракна. Ана Магьсудов Расулани (38 кг) Саидов Нурмегьамеда (45 кг) — 1, Гьашимов Гьайдара (77 кг) 3-чкаяр кьуна.
2019-йисан февралдиз ДагОгни шегьерда какахьай единоборствойрай Дагъустандин чемпионат кьиле фена. Ана Авадан хуьряй 5 спортсменди иштиракна, абуру вадани кIвенкIвечи чкаяр кьуна. ИкI, абурукай Р.Магьсудов (38 кг), Н.Саидов (45 кг), Гь.Гьашимов (77 кг) -1, Къ.Эльдаров (45 кг) — 2, М.Шамхалов (55 кг) 3-чкайриз лайихлу хьана. Приздин чкаяр кьур спортсменар грамотайриз, кубокриз ва медалриз лайихлу хьана.
Чна жаван спортсменриз къазанмишнавай агалкьун тебрикзава. Къуй чи жегьилрихъ спортда ва кIелунра мадни еке агалкьунар хьурай!
Азиз Магьмудов, муаллим, ветеран
