28-февралдиз Дербентда, Лезгийрин СтIал Сулейманан тIварунихъ галай госмуздрамтеатрда, халкьдин рикI алай, гьуьрметни машгьурвал къазанмишнавай Дагъустандин халкьдин, РФ-дин лайихлу артист  Абдуллагь  Гьабибов  дидедиз хьайи­далай инихъ — 70, яратмишунрин рекье зегьмет чIугваз 50 йис тамам хьуниз талукьарнавай шад межлис кьиле фена.

Мярекатда Сулейман-Стальский райондин муниципалитетдин кьилин сад лагьай заместитель Лацис Оружева, Мегьарамдхуьруьн рай­ондин администрациядин кьилин заместитель Марта Абдуллаевади, Докъузпара райондин кьилин куьмекчи Исма­ил Къурбанова, Чахчахрин хуьруьн кьил Ибадуллагь Аю­бо­ва, “Лезги газетдин” кьилин редактор Мегьамед Ибрагьимова, район­эгьли Мусафенди Велимурадова, карханайрин руководителри, Дербент шегьерда кардик квай  культурадин маканрин векилри, Кьиблепатан Дагъустандин районрай ва шегьеррай атанвай Абдуллагь Гьабибован яратмишунрал рикI алай ксари иштиракна.

А.Гьабибоваз юбилей сифте нубатда театрдин директор Динара Эминовади, кьилин режиссер Мирзебег Мирзебегова, театрдин профкомдин председатель Вадим Рамазанова тебрикна ва адав те­а­тр­дин искусстводин хиле яргъал йисара бегьерлуда­каз зегьмет­ чIугунай Гьуьрметдин грамота вахкана. Динара Эминовади хабар гайи­вал, мукьвара Абдуллагь Гьабибовав гьукуматдин наградани агакьда.

Юбилярдин тIварцIихъ хуш  келимаяр Лацис Оружева­, Мегьа­мед Ибрагьимова, Мусафенди Велимурадова, Марта Абдуллаевади, Исмаил Къур­ба­нова, Ибадуллагь Аюбова ва масабуруни лагьана.

Межлисдин сергьятра аваз къалурай нумрайра Дагъустандин халкьдин артистар Суьлгьия Гьажиевади, Фаризат Зейналовади, Зарифа Къухмазовади, Дагъустандин лайихлу артист Руслан Пирвердиева, бажарагълу артистри — Э.Къараха­новади, Г.Эмиралиева, Э.Ва­гьа­бовади, В.Сулейманова, С.Рама­занова­ди, Р.Рамазанова, Ф.Фей­зуллаевади,  А.Керимовади гъве­чIи артистка Марьяма ва ашукь Айдуна иштиракна.

Мярекатдин эхирдай А. Гьабибова вичин межлис кьиле тухуз куьмек гайи санал кIвалахзавай юлдашриз ва мярекатдиз атанвай вирибуруз сагърай лагьана.

Къагьриман Ибрагьимов