16-февралдиз Дондал алай Ростов шегьерда азаддаказ кьуршахар кьунай и областдин чемпионат кьиле фена. Аниз областдин вири районрай ва къвалав гвай маса шегьеррайни гзаф спортсменар атанвай. И акъажунра вичин ери-бине Ахцегь райондин Къучагърин хуьряй тир Камил Мамедгьуьсейновани иштиракна. 61 кг-дин заланвал авайбурун арада чи ватанэгьлиди 1-чка кьуна. Адаз Ростовский областдин физический культурадинни спортдин рекьяй министрди къизилдин медаль, 1-дережадин диплом гана.
Камил Мамедгьуьсейнов 1996-йисуз Махачкъала шегьерда дидедиз хьана. Алай вахтунда жегьилди Дагъустандин госуниверситетдин юридический факультетдин 3-курсуна кIелзава. Школада 4-класс акьалтIарайдалай кьулухъ ада къенин йикъалди тренер Зейнал Жамалован гъилик кьуршахар кьунин сирер чирзава. 12 йис тамам хьайи вахтунда Камила сифтегьан гъалибвал къазанмишна. 2008-йис. Ватан хуьдайбурун йикъаз талукьарна, “Динамо” РДЮШОР-да школьникрин арада кIвенкIвечивал къазанмишун патал кьиле тухвай акъажунра 28 кг-дин заланвал авайбурун арада Камил 2-чкадиз лайихлу хьанай. Гьа и йисан 7-ноябрдиз Махачкъала шегьердин администрациядин спортдин, туризмадин ва жегьилрин крарин рекьяй комитетди тешкилай акъажунра К.Мамедгьуьсейнова 32 кг-дал къведалди заланвал авай жаванрин арада 1-чка кьунай. Али Алиеван тIварунихъ галай спортдин махсус школади 1995-1996-йисара дидедиз хьайи жаванрин арада тешкилай акъажунрани ам 1-чкадиз лайихлу хьана. 2011-йис чи спортсмен патал мадни лишанлуди хьанай. Ада заланвилин цIийи категориядай вичин къуватар ахтармишиз башламишнай. ИкI, июлдин вацра 1996-1998-йисара ханвай аялрин арада Махачкъала шегьердин кIвенкIвечивал, Олимпиададин къугъунрин ва дуьньядин чемпионар тир стхаяр Жабраиловрин призар патал кьиле тухвай турнирдани ада 42 кг-дал къведалди заланвал авайбурун арада 1-чка кьунай, гьакI вич виридалайни хъсан техника авай спортсмен язни къалурнай. 2013-йисуз Ростов шегьерда Кеферпатан Кавказдин студентрин арада кьуршахар кьунай кьиле фейи олимпиадада 57 кг-дин заланвал авайбурун арада Камил 1-чкадиз лайихлу хьанай.
Къейд авун лазим я хьи, Камила вичин къуватар грекринни римлуйрин жуьреда кьуршахар кьунайни ахтармишзава. Инани пис нетижаяр къазанмишзавач. Алай вахтунда и кьегьал хва азаддаказ кьуршахар кьунай 2019-йисан зонайрин арада кьиле фидай акъажунриз гьазур жезва. Чи мурад Камилахъ гележегда мадни еке агалкьунар хьун я!
Агьмед Агьмедагъаев
