РикIел аламукьдай са жерге маса цIийивилер ва вакъиаяр хьиз, къадим Дербентдин музейрин комплексдин уьмуьрдани лишанлу кар хьана. Адан директор Али Ибрагьимова чкадин массовый информациядин такьатриз малумарайвал, музей-заповедникдин архитектурадин надир памятникар Виридуьньядин ирсинин сиягьдик акатайдалай инихъ 15 йис тамам хьанва…
И барадай рикIел хкана кIанда: Дербентдин Нарын-къеле цитадель, куьгьне шегьер ва къеледин имаратар мукьуфдивди ахтармишайдалай кьулухъ абур ЮНЕСКО-дин къаюмвилик, Виридуьньядин лап зурба метлеб авай ивиррин сиягьдик кутунин къарар 2003-йисан 3-июндиз кьиле фейи ЮНЕСКО-дин комитетдин 27-сессиядал кьабулайди я. Гьа чIавуз, яни сессиядал, Дербентдин музей-заповедникдин архитектурадин памятникар хуьнин, цIийикIа туьхкIуьр хъувунин жигьетдай серенжемар ва кьиле тухун лазим тир кIвалахарни тайинарна.
Лишанлу вакъиа къадим Дербентда гегьеншдиз къейдна. Музей-заповедникдин илимдин къуллугъчийри “15-йисуз ЮНЕСКО-дихъ галаз санал” лишандик кваз шегьердин мектебра, кьилин ва юкьван образованидин са жерге идарайра итижлу суьгьбетар тешкилна ва и кIвалах давамарзава.
Нариман Къарибов
