Сулейман-Стальский райондин кьил Нариман Абдулмуталибова и йикъара (чпи виликдай Курхуьруьн ва Кьасумхуьруьн 1-нумрайрин юкьван школаяр акьалтIарай) студентар — Дагъустан Республикадин Кьилин стипендиатар тир Шикер Шихбабаева ва Шагьзада Салманова шад гьалара кьабулна, абурув Имам Яралиеван мергьяматлувилин “Умуд” фондунин патай чухсагъулдин чарар ва пулдин премияр вахкана.
Дагъустандин госуниверситетдин химиядин факультетдин 5-курсунин студентка Шикер Шихбабаева ва Москвадин А.Евдокимован тIварунихъ галай государственный медико-стоматологический университетдин 4-курсунин студентка Шагьзада Салманова кIелунра кьетIен лайихлувилерай РД-дин Кьилин стипендийриз лайихлу хьана.
Сифте нубатда, Нариман Шамсудиновича райондин школаяр акьалтIарна, кесерлу университетра агалкьунралди кIелун давамарун ва республикадин Кьилин стипендия къачун мубаракна.
— КIелунра агалкьунар къазанмишун — им сифте нубатда куьне квел чIугур дурумлу зегьметдин нетижа я, — лагьана Н.Абдулмуталибова. — Чна квелди дамахзава. Лугьуз жеда хьи, куьне чи ихтибар кьилиз акъудна. Чун кIевелай а кардални инанмиш я хьи, квекай хъсан пешекарарни хкатда.
Гуьруьшдал Шикер Шихбабаевадиз ва Шагьзада Салмановадиз тебрикдин келимаяр гьакIни райадминистрациядин кьилин 1-заместитель Лацис Оружева, райадминистрациядин крар идара ийизвайди тир Рамазан Абдулазизова, образованидин управленидин начальник Къачабег Аминова ва информагентстводин руководитель Жабраил Асланова лагьана.
Хазран Кьасумов
