И мукьвара чав шад хабар агакьна: Италиядин Агридженто (Сицилия) шегьерда дуьньядин халкьарин литературайрай “Парнас — премия Анджело Ла Веккья” тIвар алаз тешкилай чIехи конкурсда (аниз дуьньядин гзаф пипIерай вишералди шиирар рекье тунвай) чи лезги хва, ахцегьвияр тир Аливердиеврин къалин сихилдин векил, ДГУ-дин профессор, РАН-дин ДНЦ-дин ИПГ-дин лабораториядин заведующий, илимдин кьилин къуллугъчи Абутраб Александрович “Коммуникация ва пресса” номинациядай гъалибчи хьана. Адаз и конкурсдин кьилинбурукай тир Анджело Ла Веккьядин премия ва къизилдин медаль ганва.
Премия чи республикадин векилдив Италиядин Каникатти шегьердин театрда шадвилин мярекатдал вахкана. Анал чи республикадин культурадин министрдин тебрикдин чарни кIелна.
Лагьана кIанда, ихьтин агалкьун чи алим физикди-лирикди къазанмишзавайди сад лагьай сеферда туш. ИкI, адакай 2017-йисуз Санкт-Петербургда кьиле фейи Россиядини Японияди санал тешкилай “Танка” конкурсдин, 2006-йисуз “Россиядин къизилдин перо” конкурсдин гъалибчи хьанай.
Абутраб Аливердиева урус чIалал кхьизва, гьа са вахтунда вичи абур къецепатан чIаларизни (ингилис, итальян ва маса) элкъуьрзава. И сефердани шиир ада урус чIалал кхьенвай ва ингилис чIалаз вичи таржума авунвай. Гзаф миллетрин векилрикай ибарат жюриди Абутраб Аливердиеван устадвал кьетIенди тирди къейдна. Шиир итальян чIалал акъатзавай “Международный Парнас” антологиядик кутунва.
Чнани алимдиз, шаирдиз, таржумачидиз цIийи агалкьун рикIин сидкьидай тебрикзава. Агъадихъ адан шиирни гузва.
* * *
Мандолина къугъваз гъилел,
Устаддив гва хупI гьевес.
Къвазвайди хьиз цаварай сел,
КичIезва заз батмиш жез.
Амма гьина?! Гондола туш,
Зун манийрин луьткведи,
Венецияда ваъ, кIвале сархуш
Тухузва хуш уьлкведиз.
Гур манийрин шад демина
Ава за кьил элкъуьриз.
Гондолерни мандолина —
Мана сад хьиз я рикIиз.
Чархунава кьуд пад алем,
Кьуьлуьник ква гьакъикъат.
Рагъул ятар катна бегьем,
Шегьер я зи фаракъат.
Урус чIалай. Таржума Мерд Алидин.
