Чна виликдай хабар гайивал, ГИБДД-дин талукь къуллугъди Махачкъалада “Аялар я — мукъаят хьухь!” лишандик кваз махсус серенжемдин сад лагьай пай кьиле тухванай. Гила (алай йисан 28-августдилай 11-сентябрдалди) адан 2-пай тухудайвал я.
РикIел хкин, Махачкъалада алай йисан эвел кьилелай инихъ аялрин иштираквал авай 44 авария регистрация авунва. Нетижада 2 аял телеф, 44-даз хасаратвилер хьана.
Къейд ийин хьи, школайра тарсар башламишзавай вахтунда туькьуьл дуьшуьшар иллаки гзаф жезва. И кардихъ галаз алакъалу яз махсус серенжемдин вахтунда ДПС-дин (дорожно-постовая служба) къуллугъдин векилри аялрин бахчайрани школайра аялрихъ, диде-бубайрихъ галаз рекьера гьерекат авунин къайдайриз талукь суьгьбетар тухуда. КьетIен фикир рекьера гьерекат авунин къайдаяр чIурзавайбурун вилик пад кьуниз, аялар тухузвай транспортдал гуьзчивал артухаруниз гуда.
Гьуьрметлу диде-бубаяр! Куь балайрилай гуьзчивал алудмир, абуруз машинрин гьерекат квай рекьера чеб тухудай къайдаяр чира. Мисал яз, рекьерин какатай чкайрилай элячI тавун, светофорди яру экв кузвайла рекьин муькуь патаз экъечI тавун ва икI мад. Сифте нубатда куьне рекьера гьерекат авунин къайдайрал амал я. Чир хьухь, куьн абуруз чешне я.
Полициядин къуллугъчийри рекьера гьерекатдик квай вири шоферриз, гьакIни кIвачи-кIвачи физвайбуруз тайинарнавай къайдайрин истемишунрал амал авуниз, датIана игьтият хуьниз эвер гузва.
Радик Гъафизов, полициядин старший лейтенант
